Bugun Xalq deputatlari Olmaliq shahar Kengashining navbatdagi 53-sessiyasi bo‘lib o‘tdi. Yig‘ilishni eng ko‘p deputatlik o‘rniga ega O‘zbekiston Liberal-demokratik partiyasi (O‘zLiDeP) deputatlik guruhi rahbari Behzod Salimov olib bordi.

Sessiya ishida Kengash deputatlari, siyosiy partiyalarning shahar Kengashlari raislari hamda tegishli tashkilot, idora va muassasalar rahbarlari ishtirok etdi.

Kengash kun tartibiga quyidagi masalalar kiritildi va muhokama qilindi:
1. Olmaliq shahar mahalliy budjetining 2026-yil 2-chorak daromadlar rejasini orttirib bajarilgan qismi hisobidan mablag‘lar yo‘naltirish to‘g‘risida.
2. Xalq deputatlari Olmaliq shahar Kengashining 2026-yil 11-sentabrdagi VII-52-76-10-147-K/26-sonli qaroriga o‘zgartirish va qo‘shimcha kiritish to‘g‘risida.
3. O‘zbekiston Respublikasi Vazirlar Mahkamasining 462-sonli qaroriga asosan Olmaliq shahridagi mahallalar kesimida “Saxovat va ko‘mak” jamg‘armasi mablag‘larini qayta taqsimlash to‘g‘risida.
4. Olmaliq shahar “Inson” ijtimoiy xizmatlar markazi tomonidan 2026-yilning 6 oyi davomida amalga oshirilgan ishlar to‘g‘risida.

Kun tartibidagi masalalar yuzasidan Kengashning doimiy komissiya raislari xulosalari hamda deputatlarning mulohazalari eshitildi. Muhokamalar yakuniga ko‘ra, shahar rivojlanishi va aholi farovonligini oshirishga qaratilgan tegishli qarorlar bir ovozdan qabul qilindi.

Sessiyada ayrim deputatlar onlayn tarzda ishtirok etganligi sababli Sanoq komissiyasi hamda Sessiya kotibining yakuniy axborotlari tinglandi va tasdiqlandi.

Ochiqlik va shaffoflik: Sessiya jarayoni jamoatchilik uchun to‘liq ochiq tarzda, shahar Kengashining rasmiy Facebook sahifasi orqali jonli efirda uzatildi.