Navbatdagi manzilli o‘rganish ishlari 5-Do‘stlik saylov okrugi deputati, Marg‘ilon shahar hokimi E. Rustamov tomonidan “Xo‘japorso” mahallasida amalga oshirildi.

O‘rganish davomida kambag‘allik reyestriga kiritilgan oilalarning ijtimoiy-iqtisodiy ahvoli, kundalik hayotida duch kelayotgan muammolari va mavjud ehtiyojlari atroflicha ko‘rib chiqildi. Asosiy e’tibor oilalarning muammolarini aniqlash bilangina cheklanmay, ularni hal etishning aniq yo‘llarini belgilash, ijtimoiy qo‘llab-quvvatlash choralarini kuchaytirish hamda aholining turmush sharoitini yaxshilash imkoniyatlariga qaratildi.

Ayniqsa, vaqtincha ishsiz fuqarolarni doimiy daromad manbai bilan ta’minlash masalasi o‘rganishning muhim yo‘nalishlaridan biri bo‘ldi. Fuqarolarni mavjud bo‘sh ish o‘rinlariga yo‘naltirish, kasb-hunarga o‘qitish va tadbirkorlik faoliyatiga jalb etish orqali ularning iqtisodiy faolligini oshirish imkoniyatlari ko‘rib chiqildi.

Zero, kambag‘allikni qisqartirish faqat moddiy yordam ko‘rsatish bilan cheklanmaydi. Uning samarali yechimi — oilalarning o‘z daromadini shakllantirishi, mehnat bozorida munosib o‘rin egallashi va barqaror iqtisodiy mustaqillikka erishishi uchun zarur shart-sharoitlarni yaratishdir. Shu bois har bir oilaning holatidan kelib chiqib yondashish, mavjud imkoniyatlarni ishga solish va muammolarni manzilli hal etish alohida ahamiyat kasb etadi.

Mazkur o‘rganishlar deputatlik faoliyatining aholi manfaatlarini himoya qilish, hududlardagi ijtimoiy muammolarni aniqlash va ularning yechimi yuzasidan amaliy choralar ko‘rishga qaratilgan muhim yo‘nalishlaridan biridir. Eng muhimi, fuqarolarning murojaat va ehtiyojlarini joyida o‘rganish orqali tegishli masalalarga bevosita e’tibor qaratish, mavjud imkoniyatlarni safarbar etish hamda natijadorlikka erishish ko‘zda tutiladi.