Uzun tumani Kengashi raisi va deputatlari Taxiatoshni rivojlantirish bo‘yicha tajriba almashishmoqda


Prezidentimiz tashabbusi bilan hududlarni ijtimoiy-iqtisodiy rivojlantirish, ilg‘or tajribalarni ommalashtirish hamda biriktirilgan hududlarga amaliy ko‘mak ko‘rsatish maqsadida hududlararo hamkorlik tizimi yo‘lga qo‘yilgan.

Mazkur tizim doirasida Qoraqalpog‘iston Respublikasining Taxiatosh tumani Qushchilik mahallasi Surxondaryo viloyatining Uzun tumaniga biriktirilgan.

Shu munosabat bilan Xalq deputatlari Uzun tumani Kengashi raisi D.Safarova boshchiligidagi deputatlar, tashkilot va korxona rahbarlari hamda tuman faollaridan iborat ishchi guruh Taxiatosh tumaniga tashrif buyurib, hududdagi holat va imkoniyatlar bilan yaqindan tanishdi.

Tashrif davomida Taxiatosh tumani hokimi Islambek Sdiqov hamda Uzun tumani deputatlari va vakillari o‘rtasida uchrashuv o‘tkazildi. Unda hududni rivojlantirish, mavjud imkoniyatlardan samarali foydalanish, ilg‘or tajribalarni o‘rganish hamda istiqbolli loyihalarni amalga oshirish masalalari atroflicha muhokama qilindi.

Uchrashuv yakunida ikki tomonlama hamkorlikni mustahkamlash va belgilangan yo‘nalishlarda amaliy ishlarni yo‘lga qo‘yishga qaratilgan memorandumlar imzolandi.