Zangilambop mahallasida deputatlik nazorati olib borildi

Joriy yilning 7-oktabr kuni Xalq deputatlari Surxondaryo viloyati Kengashi kotibiyati mudiri Sh. Boyqulov kunlik ish rejasiga asosan Xalq deputatlari Angor tumani Kengashi kotibiyati mudiri M.Yarmatovning 22-Zartepa okrugiga qarashli Zangilambop mahallasida deputatlik nazorati o‘tkazdi.

Mahalla hududidagi mavjud muammolar, amalga oshirilayotgan ishlar hamda aholi uchun yaratilayotgan shart-sharoitlar bilan tanishdi.Jumladan, mahalla hududidagi yo‘lning 2 kilometrlik qismiga shag‘al-tosh to‘kilgani, buning natijasida fuqarolarning harakatlanishi uchun qulayliklar yaratilayotgani o‘rganildi. Mazkur ishlarning aholi turmush sharoitiga ijobiy ta’siri yuzasidan mahalla raisi bilan fikr almashildi.

Shuningdek, mahallani kuz-qish mavsumiga tayyorlash, aholi xonadonlarining elektr energiyasi bilan ta’minlanishi, elektr tarmoqlari va tegishli texnik vositalarning holati hamda mavsum davomida yuzaga kelishi mumkin bo‘lgan muammolarning oldini olish masalalariga alohida e’tibor qaratildi.

O‘rganish davomida «24-tavsiya» ijrosining ta’minlanishi, xususan, kuz-qish mavsumiga puxta tayyorgarlik ko‘rish va elektr energiyasi ta’minotidagi barqarorlikni ta’minlash bo‘yicha amalga oshirilayotgan ishlar yuzasidan mahalla raisining ma’lumotlari tinglandi.

Deputatlik nazorati davomida aniqlangan masalalar yuzasidan mas’ullarga tegishli tavsiya va takliflar bildirilib, aholi manfaatlarini ta’minlash, mavjud muammolarni o‘z vaqtida bartaraf etish hamda mavsumni betalofat o‘tkazish bo‘yicha ishlarni izchil davom ettirish zarurligi ta’kidlandi.