Shahrimizda yangi xonadonlar bunyod etilmoqda

Xalq deputatlari Namangan shahar Kengashi deputati, shahar hokimi Ayubxon Kamalov shahar hududida bunyod etilayotgan ko‘p qavatli uy-joylarda olib borilayotgan qurilish ishlari bilan tanishdi.

Xususan, Hamroh ko‘chasida “Istiqlol javohiri” XK tomonidan barpo etilayotgan 9 qavatli, 64 xonadonli, shuningdek, Boburshoh ko‘chasida “Progress Global Logistic” MChJ tomonidan qurilayotgan 7 qavatli, 36 xonadonli uy-joylar ko‘zdan kechirildi.

O‘rganish davomida qurilish-montaj ishlarining sifati, obyektlarning belgilangan rejaga muvofiq borishi, qurilish jarayonida amaldagi talab va me’yorlarga rioya etilishi hamda ishlarni yakunlash muddatlari tahlil qilindi.

Shuningdek, aniqlangan ayrim kamchiliklarni bartaraf etish, qurilish ishlarini sifatli tashkil etish, xavfsizlik talablariga qat’iy rioya qilish hamda obyektlarni belgilangan muddatlarda foydalanishga topshirish yuzasidan mas’ullarga tegishli topshiriq va ko‘rsatmalar berildi.

Shahrimizda zamonaviy, shinam, qulay va sifatli uy-joylar barpo etish, aholi uchun munosib yashash sharoitlarini yaratish borasidagi bunyodkorlik ishlari izchil davom ettirilmoqda.