Xalq deputatlari Zomin tuman Kengashi tomonidan O‘zbekiston Respublikasining “Korrupsiyaga qarshi kurashish to‘g‘risida”gi Qonuni (O‘RQ-419) ijrosini ta’minlash, korrupsiyaning oldini olish, ochiqlik va shaffoflik tamoyillarini mustahkamlash hamda jamiyatda korrupsiyaga nisbatan murosasiz munosabatni shakllantirish borasida tizimli ishlar amalga oshirilmoqda.

Mazkur Qonun 2017-yil 3-yanvarda qabul qilingan bo‘lib, korrupsiyaga qarshi kurashish sohasidagi davlat siyosatining asosiy yo‘nalishlarini, korrupsiyaning oldini olish mexanizmlarini hamda korrupsiyaga oid huquqbuzarliklarning oqibatlarini bartaraf etishning huquqiy asoslarini belgilaydi.

Qonun rekvizitlari:
Qonun raqami – O‘RQ-419
Qabul qilingan sana – 2017-yil 3-yanvar

Qonunning asosiy maqsadi davlat organlari, tashkilotlar va muassasalarda korrupsiyaning oldini olish, davlat xizmatlarining ochiqligi va shaffofligini ta’minlash, fuqarolarning huquq hamda qonuniy manfaatlarini himoya qilishdan iborat.

Ayni paytda Xalq deputatlari Zomin tuman Kengashi deputatlari tomonidan mazkur Qonun ijrosi yuzasidan tuman hududidagi davlat organlari va tashkilotlarida deputatlik nazorati tartibida monitoring va o‘rganish ishlari olib borilmoqda. O‘rganishlar davomida korrupsiyaning oldini olish bo‘yicha amalga oshirilayotgan chora-tadbirlar, ichki nazorat tizimi, manfaatlar to‘qnashuvining oldini olish, murojaatlar bilan ishlash hamda ochiqlikni ta’minlash holati tahlil qilinmoqda.

O‘rganishlar yakuni bo‘yicha aniqlangan holatlar umumlashtirilib, mavjud muammo va kamchiliklarni bartaraf etish yuzasidan tegishli takliflar ishlab chiqiladi hamda masala Xalq deputatlari Zomin tuman Kengashining Korrupsiyaga qarshi kurashish va xavfsizlik masalalari bo‘yicha doimiy komissiyasi muhokamasiga kiritiladi.

Deputatlik nazorati orqali qonun ijrosini ta’minlash, korrupsiyaning oldini olish va davlat organlari faoliyatining ochiqligi hamda hisobdorligini kuchaytirish yo‘lidagi ishlar izchil davom ettiriladi.