Xalq deputatlari Karmana tumani Kengashining 12-Bunyodkor saylov okrugidan O‘zbekiston “Milliy tiklanish” demokratik partiyasi orqali saylangan deputat Jumayeva Feruza Ruzikulovna tumanda joylashgan ko‘zi ojizlar kutubxonasiga tashrif buyurdi.
Ushbu tashrifning asosiy maqsadi — O‘zbekiston Respublikasining “Nogironligi bo‘lgan shaxslarning huquqlari to‘g‘risida”gi Qonuni 18-moddasi ijrosini, ya’ni nogironligi bo‘lgan shaxslarning madaniy hayotda boshqalar bilan teng ravishda ishtirok etish huquqlari tumanda qay darajada ta’minlanayotganini o‘rganishdan iborat bo‘ldi. Mazkur qonun moddasida davlat ko‘zi ojiz shaxslar uchun qulay shakldagi madaniy materiallardan, xususan, Brayl alifbosidagi va audio kitoblardan erkin foydalanish imkoniyatini yaratishi shartligi qat’iy belgilab qo‘yilgan.
Tashrif davomida deputat kutubxonaning bugungi faoliyati, kitobxonlar va tashrif buyuruvchilar uchun yaratilgan shart-sharoitlar, xususan, qonun talablariga mos ravishda Brayl alifbosidagi hamda audio kitoblar fondining holati bilan yaqindan tanishdi. Imkoniyati cheklangan fuqarolarning madaniy va ma’naviy ehtiyojlarini qondirish, ularning bilim olishi va jamiyatga integratsiyalashuvi uchun qulay, to‘siqlarsiz muhit yaratish masalalariga alohida e’tibor qaratildi.
Samimiy ruhda o‘tgan uchrashuv yakunida qonunchilikda belgilangan imtiyoz va huquqlardan kelib chiqib, kutubxona faoliyatini yanada rivojlantirish, kitobxonlar safini kengaytirish hamda mavjud muammolarni bartaraf etish yuzasidan o‘zaro fikr almashilib, kelgusidagi vazifalar belgilab olindi.