Xalq deputatlari G‘ozg‘on shahar Kengashi deputati O.Sharipov tomonidan Guliston MFY hududida saylovchilar bilan uchrashuv tashkil etildi. 

Mazkur uchrashuvdan ko‘zlangan asosiy maqsad fuqarolar bilan ochiq muloqot o‘tkazish, ularning murojaat va takliflarini tinglash hamda hududda mavjud muammolarni o‘rganishdan iborat bo‘ldi. 

Uchrashuv davomida mahalla aholisini qiynab kelayotgan masalalar, jumladan hudud infratuzilmasini yaxshilash, yo‘llarni ta’mirlash, obodonlashtirish va ko‘kalamzorlashtirish ishlari, ijtimoiy soha obyektlari faoliyatini yanada takomillashtirish bo‘yicha fuqarolar tomonidan qator taklif va murojaatlar bildirildi.
Deputat tomonidan ushbu masalalar yuzasidan tegishli tashkilotlar bilan hamkorlikda ularni bosqichma-bosqich hal etish choralarini ko‘rish zarurligi ta’kidlandi.

Shuningdek, uchrashuv davomida mamlakatimizda hududlarni ijtimoiy-iqtisodiy rivojlantirish, mahallalarda amalga oshirilayotgan islohotlar hamda qabul qilingan normativ-huquqiy hujjatlar mazmun-mohiyati haqida ham ma’lumot berildi. 

Jumladan, O‘zbekiston Respublikasi Vazirlar Mahkamasining 2021-yil 18-iyundagi 380-son qarori, 2022-yil 21-apreldagi 206-son qarori, shuningdek hududlarda infratuzilmani rivojlantirish, obodonlashtirish hamda aholi turmush sharoitini yaxshilashga qaratilgan boshqa qarorlar ijrosi yuzasidan olib borilayotgan ishlar haqida so‘z yuritildi.
Uchrashuv davomida fuqarolarning murojaatlari yozib olindi hamda ayrim masalalar joyida hal etildi.
Qolgan murojaatlar yuzasidan tegishli mutasaddi tashkilotlarga so‘rovlar yuborish va ularning ijrosini nazoratga olish belgilab olindi.

Bunday uchrashuvlar saylovchilar bilan doimiy muloqotni yo‘lga qo‘yish, hududdagi dolzarb muammolarni aniqlash hamda ularni bartaraf etish orqali
aholi farovonligini ta’minlashga xizmat qiladi.