NAMANGAN SHAHRIDA QONUNIYLIKNI MUSTAHKAMLASH VA JINOYATCHILIKKA QARSHI KURASHISH MASALALARI MUHOKAMA QILINDI

Xalq deputatlari Namangan shahar Kengashining Korrupsiyaga qarshi kurashish va xavfsizlik masalalari bo‘yicha doimiy komissiyasi yig‘ilishida Namangan shahar prokuraturasining 2026-yil uchinchi choragida qonuniylikni mustahkamlash, huquqbuzarliklarning oldini olish hamda jinoyatchilikka qarshi kurashish borasida amalga oshirilgan ishlar yuzasidan axboroti muhokama qilindi.

Yig‘ilishda doimiy komissiya raisi, 17-Sohibkor saylov okrugi deputati Narimon Dehqonov hamda komissiya kotibi, 12-Dambog‘ saylov okrugi deputati Xakimaxon Toshmatova ishtirok etdi.

Prokuratura axborotiga ko‘ra, 2026-yilning uchinchi choragida shaharda jami 772 ta jinoyat qayd etilgan. Shu bilan birga, ayrim turdagi jinoyatlar kamaygan. Jumladan, bosqinchilik jinoyati sodir etilmagan, o‘g‘rilik 10,2 foizga, bezorilik 21,1 foizga, oilaviy-maishiy zo‘ravonlik holatlari esa 50 foizga kamaygani qayd etilgan.

Shu bilan birga, odam o‘ldirish, nomusga tegish, firibgarlik va og‘ir tan jarohati yetkazish kabi ayrim jinoyat turlarining ortgani profilaktik tadbirlarni yanada kuchaytirish zarurligini ko‘rsatishi ta’kidlandi.

Muhokamada O‘zbekiston Respublikasi Prezidentining 2025-yil 18-martdagi PQ-111-son “Respublikadagi kriminogen vaziyatni kundalik tahlil qilish faoliyatini tashkil etish chora-tadbirlari to‘g‘risida”gi qarori ijrosi doirasida amalga oshirilgan ishlar ham ko‘rib chiqildi.

Mazkur masala deputatlik faoliyatining 24 ta eng muhim yo‘nalishi doirasida qonuniylikni ta’minlash, fuqarolar xavfsizligini mustahkamlash va huquqbuzarliklarning oldini olishga qaratilgan vazifalar bilan bog‘liq.

Yig‘ilish yakunida jinoyatchilikka sabab bo‘layotgan omillarni aniqlash, profilaktika ishlarini kuchaytirish hamda mas’ul tashkilotlar tomonidan belgilangan vazifalar ijrosini ta’minlash muhimligi qayd etildi.