Xalq deputatlari Termiz shahar Kengashi deputatlari tomonidan hududlarda aholi bilan ochiq muloqot o‘rnatish, fuqarolarni qiynayotgan muammolarni joyiga chiqqan holda o‘rganish hamda ularning yechimi yuzasidan tegishli tashkilotlar bilan hamkorlikda amaliy choralar ko‘rishga alohida e’tibor qaratilmoqda.

Shu maqsadda Xalq deputatlari Termiz shahar Kengashining 14-“Bog‘zor” saylov okrugi deputati O.Sharofutdinova hamda Kengash kotibiyati bosh mutaxassisi R.Mamashukurov okrug hududidagi “Gulira’no” mahallasida bo‘lib, Saroymulkxonim ko‘chasida istiqomat qiluvchi fuqarolar bilan uchrashuv o‘tkazdi.
Uchrashuv davomida ko‘cha aholisi o‘zlarini qiynab kelayotgan bir qator infratuzilma masalalarini ko‘tarib, ularni hal etishda deputatdan amaliy yordam so‘radi.

Xususan, fuqarolar tomonidan Saroymulkxonim ko‘chasida piyodalar yo‘lakchasini tashkil etish hamda ko‘chadagi xonadonlarni markazlashgan oqova suv tarmog‘iga ulash masalalari yuzasidan murojaatlar bildirildi. Aholining ta’kidlashicha, ushbu masalalarning hal etilishi ko‘chada harakatlanish qulayligini oshirish, piyodalar xavfsizligini ta’minlash hamda yashash sharoitlarini yanada yaxshilashda muhim ahamiyat kasb etadi.

Murojaatlar joyida tinglanib, ko‘tarilgan masalalarning mazmuni va ularni hal etish imkoniyatlari yuzasidan tegishli o‘rganish ishlarini olib borish zarurligi qayd etildi. Deputat tomonidan fuqarolar murojaatlari belgilangan tartibda qayd etib olindi.

Aniqlangan muammolarni hal etish, mas’ul tashkilotlarning e’tiborini mazkur masalalarga qaratish hamda ularning qonuniy yechimini ta’minlash maqsadida tegishli tashkilotlarga deputatlik so‘rovlari yuborish belgilab olindi. Shuningdek, murojaatlarda ko‘tarilgan masalalarni vakolatli idoralar bilan hamkorlikda o‘rganish va ularning yechimi yuzasidan tegishli choralar ko‘rilishiga erishish muhim vazifa sifatida belgilandi.

Fuqarolar bilan bunday uchrashuvlar hududlardagi mavjud muammolarni aniqlash, aholining taklif va talablarini o‘rganish hamda ularni hal etishda deputatlik nazoratining samaradorligini oshirishga xizmat qiladi.