#_deputat_faoliyati
#_24_ta_masala
“Ma’rifat karvoni” — ma’naviyat va ma’rifat sari ezgu qadam

Xalq deputatlari tuman Kengashi deputati S.Kasimov tashabbusi bilan tumanda “Ma’rifat karvoni” ilmiy-ma’rifiy seminari tashkil etildi.
Mazkur tadbirning asosiy maqsadi aholi, ayniqsa, yoshlar o‘rtasida ma’naviy-ma’rifiy muhitni yanada mustahkamlash, ilm-fan va kitobxonlikka bo‘lgan qiziqishni oshirish, milliy va umuminsoniy qadriyatlarni keng targ‘ib etishdan iborat.

Seminarda faol nuroniylar, jamoatchilik vakillari, mahalla faollari hamda turli soha vakillari ishtirok etdi.

Tadbir davomida ma’rifatning inson va jamiyat hayotidagi o‘rni, yosh avlod tarbiyasida nuroniylarning hayotiy tajribasi va ibratining ahamiyati, oilada va mahallada sog‘lom ma’naviy muhitni shakllantirish masalalari yuzasidan fikr almashildi.

Shuningdek, ishtirokchilar tomonidan bugungi kunda jamiyat taraqqiyotida bilim, ilm-fan, kitobxonlik va ma’naviy tarbiyaning tutgan o‘rni haqida mulohazalar bildirildi. Nuroniylar o‘zlarining boy hayotiy tajribalari asosida yoshlarni ezgulikka, vatanparvarlikka, kattalarga hurmat va kichiklarga izzat ruhida tarbiyalash borasidagi fikrlarini o‘rtoqlashdilar.

Samimiy muloqot va ochiq fikr almashuv tarzida o‘tgan seminar ishtirokchilarda katta taassurot qoldirdi. Tadbir davomida ilgari surilgan fikr va tashabbuslar kelgusida hududda ma’naviy-ma’rifiy ishlarni yanada rivojlantirishda muhim ahamiyat kasb etishi ta’kidlandi.

“Ma’rifat karvoni” kabi ilmiy-ma’rifiy tadbirlarning muntazam tashkil etilishi aholining ma’naviy dunyoqarashini yuksaltirish, yoshlarni ilm va ma’rifatga keng jalb etish hamda jamiyatda o‘zaro hurmat, hamjihatlik va faol fuqarolik muhitini mustahkamlashga xizmat qiladi.