Mahalliy Kengashlar faoliyatining samaradorligi, qabul qilinayotgan qarorlarning hayotiyligi hamda ijro intizomining mustahkamligi bevosita doimiy komissiyalar va ekspert guruhlarining faolligiga bog‘liqdir.

Xalq deputatlari Termiz shahar Kengashi raisi D.Normuradova boshchiligida Kengashning doimiy komissiyalari raislari, ekspert guruhi a’zolari hamda Kengash kotibiyati mas’ullari ishtirokida muhim ishchi yig‘ilish o‘tkazildi.

Yig‘ilish davomida Kengash doimiy komissiyalari hamda ekspert guruhlarining o‘tgan davr mobaynidagi faoliyati tanqidiy-tahliliy ruhda ko‘rib chiqilib, quyidagi ustuvor vazifalarga alohida e’tibor qaratildi:

• Nazorat-tahlil tadbirlari natijadorligi: Oliy Majlis Senati tomonidan belgilangan “24 ta eng muhim yo‘nalish” doirasida o‘tkazilayotgan o‘rganishlarning haqqoniyligi va manzilliligi;
• Sessiyalarga tayyorgarlik sifati: Doimiy komissiyalarda ko‘rib chiqilayotgan soha hisobotlari va sessiya kun tartibiga kiritiladigan qaror loyihalarining puxtaligi;
• Ekspert guruhlari salohiyati: Qaror loyihalarini ishlab chiqishda ekspert guruhi xulosalari va ilmiy-amaliy tavsiyalaridan unumli foydalanish darajasi;
• Ijro intizomi va deputatlik so‘rovlari: Saylov okruglarida aholi tomonidan ko‘tarilayotgan muammolar bo‘yicha yuborilgan deputatlik so‘rovlarining amaliy ijrosi.

"Kengashimiz sessiyalarida qabul qilinayotgan har bir qaror zamirida doimiy komissiyalar va ekspertlarimizning mehnati, tahlili yotadi. Biz shakliy hisobotlardan butunlay voz kechib, joylardagi haqiqiy holatni ko‘rsatib berishimiz va ijro organlari oldiga aniq talablarni qo‘yishimiz shart. Har bir komissiya o‘z yo‘nalishi bo‘yicha aholi manfaatlarini himoya qilishda tashabbuskor bo‘lishi lozim," — deya ta'kidladi Kengash raisi.

Yig‘ilish yakunida doimiy komissiyalar va ekspert guruhlari ishini yanada jonlantirish, o‘rganishlar ta’sirchanligini oshirish hamda navbatdagi sessiyaga puxta tayyorgarlik ko‘rish yuzasidan mas’ullarga aniq vazifalar yuklatildi.