Ajdodlarimizdan bizga bebaho meros sifatida yetib kelgan tarixiy va madaniy obidalarni asrab-avaylash, ularning asl qiyofasini saqlab qolish hamda kelajak avlodlarga yetkazish muhim vazifalardan biridir.

Shu maqsadda moddiy-madaniy meros obyektlarini muhofaza qilish, ularning saqlanish holatini o‘rganish, zarur mablag‘lar bilan ta’minlash, hududlarini obodonlashtirish hamda bu boradagi ishlarni aholi ishtirokida samarali tashkil etish masalalari yuzasidan joylarda monitoring ishlari olib borildi.

O‘rganish jarayonida xalq deputatlari Surxondaryo viloyati Kengashi deputati B.Karimova, Termiz shahar Kengashining 13-"Shodlik" deputati A.Karimov hamda tegishli mas'ullar ishtirokida Termiz shahar hududidagi tarixiy ahamiyatga ega bo‘lgan “Qirqqiz” hamda “Kokildor ota” moddiy-madaniy meros obyektlarining bugungi holati bilan yaqindan tanishildi.

Monitoring davomida mazkur obyektlarning saqlanish darajasi, ularni muhofaza qilish va asrash bo‘yicha amalga oshirilayotgan ishlar, obyektlar atrofidagi hududlarning obodonlashtirilishi hamda sanitariya holatiga alohida e’tibor qaratildi.

Shuningdek, tarixiy obidalarning kelajak avlodlar uchun asrab qolinishini ta’minlash, ularning hududida zarur infratuzilmani yaxshilash, mavjud muammolarni o‘z vaqtida aniqlash va bartaraf etish masalalari muhokama qilindi.

O‘rganish davomida aniqlangan muammolar yuzasidan mas’ul tashkilotlar bilan tegishli tartibda ish olib borish, kamchiliklarni bartaraf etish hamda moddiy-madaniy meros obyektlarini muhofaza qilish borasidagi ishlarni yanada kuchaytirish zarurligi qayd etildi.

Tarixiy obidalar — xalqimizning ko‘p asrlik tarixi, milliy o‘zligi va ma’naviy merosining yorqin timsolidir. Ularni asrash nafaqat mutasaddi tashkilotlar, balki keng jamoatchilikning ham muhim vazifasidir.

Shu bois, moddiy-madaniy meros obyektlarini muhofaza qilish, ularning atrofini obodonlashtirish va ulardan samarali foydalanish borasidagi ishlarni izchil davom ettirish muhim ahamiyat kasb etadi.