Chilonzor tumani hokimi, xalq deputatlari Chilonzor tuman Kengashi deputati Saidqahhor Xolxo‘jayevning deputatlik okrugida obodonlashtirish ishlari davom etmoqda.

Navbatdagi o‘rganish ishlari “Novza” mahallasida olib borildi.
Ma’lumki, mazkur mahallani obodonlashtirish, aholi uchun qulay va xavfsiz hududga aylantirish ishlari tuman hokimining shaxsiy mas’ulligida amalga oshirilmoqda.

Ayni paytda mahallada keng ko‘lamli obodonlashtirish, ta’mirlash va ko‘kalamzorlashtirish ishlari olib borilmoqda.

Xususan, mahalladagi 138- va 21-sonli ko‘p qavatli uylar oralig‘ida qarovsiz holatda bo‘lgan yer maydoni obodonlashtirilib, ushbu hududda aholi va bolajonlarning mazmunli hordiq chiqarishi uchun zamonaviy bolalar maydonchasi, sport maydonchasi, vorkaut hududi hamda mahalla hududidan oqib o‘tuvchi sohil bo‘yida sayilgoh barpo etilmoqda.

O‘rganish davomida mas’ullar tomonidan qurilish jarayonlari ko‘zdan kechirilib, bajarilayotgan ishlarning sifati va xavfsizligiga alohida e’tibor qaratildi. Aniqlangan kamchiliklarni tezkorlik bilan bartaraf etish yuzasidan mas’ullarga tegishli topshiriqlar berildi.

Qurilish ishlari yaqin kunlarda yakunlanib, O‘zbekiston Respublikasi Mustaqilligining 35 yilligi arafasida ushbu maskan aholi uchun bayram tuhfasi sifatida foydalanishga topshiriladi.