Parkent tumanida hududlarni obod qilish, zamonaviy infratuzilmani rivojlantirish va aholi uchun qulay sharoitlar yaratish borasidagi ishlar izchil davom etmoqda.Ana shunday loyihalardan biri tumandagi “Qo‘shchinor” bog‘i hududida bunyod etilayotgan zamonaviy “Yoshlar markazi” hisoblanadi. Mazkur majmua atrofini obodonlashtirish, aholining mazmunli hordiq chiqarishi uchun sharoitlar yaratish, bolalar maydonchalari tashkil etish va yashil hududlarni kengaytirish kabi ishlarni ham qamrab olgan.Qurilish jarayonining borishi, obyektning belgilangan talablar asosida bunyod etilayotgani hamda ajratilgan mablag‘larning maqsadli sarflanish holatini o‘rganish maqsadida Xalq deputatlari Parkent tuman Kengashining 12-“O‘choq” saylov okrugidan saylangan deputat Xikmatova Marhabo Sulxonberdi qizi tomonidan jamoatchilik nazorati amalga oshirildi.Nazorat davomida loyiha mas’ullari, buyurtmachi tashkilot vakillari va qurilish ishlariga mas’ul ish boshqaruvchisi bilan muloqot qilinib, obyektning qurilish sur’atlari, ishlarning sifati, belgilangan muddatlarga amal qilinishi hamda texnik me’yorlar bajarilishi yuzasidan ma’lumotlar olindi.Qurilish maydonida olib borilayotgan ishlar bevosita joyida ko‘zdan kechirildi.Mas’ullar tomonidan berilgan ma’lumotga ko‘ra, bugungi kunda “Yoshlar markazi” qurilishida 57 nafar ishchi-xodim faoliyat olib bormoqda. Obyektdagi ishlar tasdiqlangan reja asosida davom ettirilayotgani, qurilishni sifatli va belgilangan muddatlarda yakunlashga e’tibor qaratilayotgani bildirildi.O‘rganish yakunida deputat tomonidan qurilish jarayonida amaldagi qurilish me’yorlari va standartlariga to‘liq rioya etish, ishlarni sifat talablariga muvofiq bajarish, obyektni o‘z vaqtida foydalanishga topshirish hamda moliyaviy mablag‘lardan oqilona va maqsadli foydalanish bo‘yicha tegishli tavsiyalar berildi.Jamoatchilik nazoratining bunday shakllari hududlarda amalga oshirilayotgan loyihalarning sifatli bajarilishini ta’minlash,mavjud kamchiliklarning oldini olish va ajratilayotgan mablag‘lardan samarali foydalanish ustidan nazoratni kuchaytirishda muhim ahamiyat kasb etadi.