Ushırasıwǵa Qaraqalpaqstan Respublikası Joqarǵı Keńesiniń komitet baslıǵı Sh.Ótemisov qatnasıp, puqaralarǵa Ózbekstan Respublikası Prezidentiniń 2026-jıl 26-iyun kúngi «Máhalleni basqarıwdı nátiyjeli shólkemlestiriwge baylanıslı qosımsha is-ilájlar haqqında»ǵı PP-116-sanlı Pármanınıń mazmunı hám áhmiyeti haqqında túsinik berdi.
Qabıl etilgen Pármanǵa tiykar máhalle institutınıń jámiyettegi rolin jánede jetilistiriw hám de «máhalle jetiligi»niń iskerligin nátiyjeli shólkemlestiriw, máhalle menen mámleketlik organlar hám jámiyetlik shólkemlerdiń úzliksiz birge islesiwin támiyinlew, máhallelerde xalıqtıń mashqalaların óz waqtında anıqlaw hám sheshiwdiń «máhalle-rayon (qala) – wálayat - respublika» sistemasın jetilistiriw arqalı «máhalle jetiligi», jergilikli mámleketlik hákimiyat organları, ministrlik hám uyımlardıń juwapkershiligin jánede asırıw haqqında túsinik berip, máhalle jumısın qollap-quwatlaw sistemasın jánede jetilistiriw boyınsha tastıyıqlanǵan «jol kartası» menen tanıstırdı.
Sońınan Qarabaylı mákan puqaralar jıyındaǵı «máhalle jetiligi»niń usı jıldıń II sheregi dawamında ámelge asırǵan jumısları boyınsha esabatları tıńlandı.
Sonday-aq, ushırasıw dawamında Xalıq deputatları Shomanay rayonlıq Keńesine 1-Qarabaylı saylaw okruginen deputat B.Begmanov 2026-jıldıń II sheregi dawamında deputatlıq iskerligi boyınsha máhalle xalqına málimleme berdi.
Ushırasıwda máhalle xalqı máhalle jetiliginiń hám aymaq deputatınıń jumıslarına qanaatlandırarlı baha bere otırıp, máhallede aldaǵı isleniwi zárúr jumıslar hám mashqalalar boyınsha óz usınıs hám pikirlerin bildirdi.
Ushırasıw sońında puqaralar ózlerin tolǵatıp kiyatırǵan máseleleri menen múrájat etti. Bul múrájatlardı tiyisli uyımlar hám shólkemler menen birgelikte sheshiw boyınsha ilájlar belgilendi.