Guliston dehqon bozorida narx-navolar deputatlik nazorati doirasida o‘rganildi

O‘zbekiston Respublikasining 1993-yil 2-sentabrdagi 913-XII-son “Mahalliy davlat hokimiyati to‘g‘risida”gi Qonuni hamda 2004-yil 2-dekabrdagi 706-II-son “Xalq deputatlari viloyat, tuman va shahar Kengashi deputatining maqomi to‘g‘risida”gi Qonunida belgilangan deputatlik vakolatlari va nazorat funksiyalari doirasida Xalq deputatlari Navoiy shahar Kengashi deputati Navro‘zov Erkin Ergashevich hamda Kengash kotibiyati bosh mutaxassisi Diyorbek Toyirov 5-Bunyodkor saylov okrugi hududida joylashgan Guliston dehqon bozori faoliyatini o‘rgandilar.

O‘rganish davomida bozorda ijtimoiy ahamiyatga ega oziq-ovqat mahsulotlari, meva-sabzavot va boshqa iste’mol tovarlarining narx-navolari, mahsulotlar sifati, savdo rastalarida yaratilgan shart-sharoitlar hamda aholiga ko‘rsatilayotgan xizmatlar holati ko‘zdan kechirildi.

Shuningdek, bozor ma’muriyati va tadbirkorlik subyektlari vakillari bilan muloqot o‘tkazilib, narxlar barqarorligini ta’minlash, mahsulotlar sifati va sanitariya-gigiyena talablariga rioya etish, iste’molchilar manfaatlarini himoya qilish hamda savdo madaniyatini yuksaltirish masalalari muhokama qilindi.

O‘rganish yakunlari yuzasidan tegishli mas’ullarga amaldagi qonunchilik talablaridan kelib chiqib zarur tavsiyalar berildi. Ta’kidlanganidek, aholini sifatli, xavfsiz va hamyonbop oziq-ovqat mahsulotlari bilan uzluksiz ta’minlash, narxlar barqarorligini saqlash hamda bozorlarda xizmat ko‘rsatish sifatini yanada oshirish doimiy deputatlik nazoratining muhim yo‘nalishlaridan biri hisoblanadi.