Yurtimizda e’lon qilingan “Mahallada obodlik va mehr-saxovat oyligi” doirasida mahallalarni obodonlashtirish, yashil hududlarni asrab-avaylash hamda ekologik madaniyatni yuksaltirishga qaratilgan amaliy ishlar izchil davom ettirilmoqda.
Xalq deputatlari Chilonzor tuman Kengashi deputati, Adolat SDP a'zosi Xusainov Alisher Abduvahobovichga Chilonzor tumani “Bek to‘pi” mahallasi 3-uyda istiqomat qiluvchi fuqarolar Sulaymonova Lola va Yusupova Muborak tomonidan uy oldi hududidagi ayrim daraxtlarning tag qismi beton bilan qoplanib qolgani, bu esa daraxtlarning parvarishi va sog‘lom rivojlanishiga salbiy ta’sir ko‘rsatayotgani yuzasidan murojaat kelib tushdi.
Mazkur murojaat deputat tomonidan joyiga chiqib o‘rganilib, masalani bartaraf etish bo‘yicha tegishli amaliy choralar ko‘rildi. Natijada daraxtlarning beton bilan qoplangan tag qismlari ochilib, atrofi tartibga keltirildi hamda hudud obodonlashtirildi.
Ushbu sa’y-harakatlar natijasida daraxtlarning erkin nafas olishi va sog‘lom o‘sishi uchun qulay sharoit yaratildi, yashil hududning ekologik holati yaxshilanib, mahalla yanada fayzli va ko‘rkam qiyofa kasb etdi.
Fuqarolar murojaatlariga o‘z vaqtida e’tibor qaratish, ularni amaliy yechimlar orqali hal etish hamda yashil hududlarni asrab-avaylash bo‘yicha olib borilayotgan ishlar mahallalarda qulay va sog‘lom yashash muhitini yaratishga xizmat qilmoqda.
🌿Har bir asrab-avaylangan daraxt — ekologiyaga qo‘shilgan hissa, har bir obod hudud esa mahalla ravnaqi va kelajak avlodlar farovonligi yo‘lida qo‘yilgan muhim qadamdir.