Xalq deputatlari Sirdaryo viloyati Kengashi kotibiyati mudiri A.Abduraxmanov hamda Xalq deputatlari Sardoba tumani Kengashi kotibiyati mudiri Q.O‘tayev tomonidan Xalq deputatlari Sardoba tumani Kengashining 2026-yil 31-martdagi VII-27-33-9-127-K/26-sonli qarori ijrosini ta’minlash yuzasidan o‘rganish ishlari amalga oshirildi.
O‘rganishlar davomida jamoatchilik fikri asosida shakllantirilgan tadbirlarni moliyalashtirish maqsadida tuman mahalliy byudjeti hisobidan shakllangan Sardoba tuman hokimligining “Fuqarolar tashabbusi jamg‘armasi” mablag‘laridan maqsadli va samarali foydalanish holati joyiga chiqqan holda tahlil qilindi.
Xususan, Yangiqishloq mahallasi ichki ko‘chalarida amalga oshirilgan obodonlashtirish va infratuzilmani yaxshilash ishlari bilan yaqindan tanishilib, loyihalarning belgilangan talablar asosida bajarilishi, ajratilgan mablag‘larning maqsadli sarflanishi hamda ishlar sifati atroflicha o‘rganildi.
O‘rganish yakunida mas’ullarga qaror ijrosini to‘liq va sifatli ta’minlash, jamoatchilik tashabbuslari asosida amalga oshirilayotgan loyihalarning samaradorligini oshirish, shuningdek, aniqlangan kamchiliklarni bartaraf etish bo‘yicha tegishli tavsiya va ko‘rsatmalar berildi.
Bu kabi o‘rganishlar byudjet mablag‘laridan oqilona foydalanish hamda aholi manfaatlariga xizmat qiluvchi tashabbuslarning samarali amalga oshirilishini ta’minlashga xizmat qiladi.