Xalq deputatlari Xiva tuman Kengashi deputati Matmuratov O‘ktam Bekmamatovich Pano Maxsim mahallasida saylovchilari hamda mahalla faollari bilan ochiq va samimiy uchrashuv o‘tkazdi.

Uchrashuv davomida deputat 2025-yildagi faoliyati yuzasidan batafsil axborot berib, hududda amalga oshirilgan ijtimoiy-iqtisodiy loyihalar, obodonlashtirish va infratuzilmani yaxshilash borasidagi ishlar haqida ma’lumot taqdim etdi. Xususan, yo‘llarni ta’mirlash, ichimlik suvi ta’minotini yaxshilash, elektr energiyasi tarmoqlarini yangilash hamda aholi bandligini ta’minlashga qaratilgan tashabbuslar yuzasidan amalga oshirilgan ishlar tilga olindi.

Fuqarolar tomonidan mahalladagi mavjud muammolar, jumladan, kommunal xizmatlar sifati, yoshlar bandligi, ko‘cha yoritish tizimini yaxshilash va ijtimoiy sohadagi ayrim masalalar yuzasidan savol hamda takliflar bildirildi. Har bir murojaat deputat tomonidan diqqat bilan tinglanib, tegishli tartibda ko‘rib chiqilishi qayd etildi.

Deputat o‘z vakolati doirasida masalalar yuzasidan tegishli tashkilot va idoralarga deputatlik so‘rovlari yuborilishini, shuningdek, muammolarni mahalla raisi hamda faollar bilan hamkorlikda bosqichma-bosqich hal etish bo‘yicha aniq chora-tadbirlar ko‘rilishini ta’kidladi.

Uchrashuv ochiq muloqot ruhida o‘tib, aholining fikr-mulohazalari va takliflari kelgusidagi ish rejalarini belgilashda muhim ahamiyat kasb etishi qayd etildi.