Озиқ-овқат хавфсизлигини таъминлаш – жамоатчилик назоратининг устувор йўналиши

Мамлакатимизда амалга оширилаётган кенг кўламли маъмурий ислоҳотлар, “Халқ давлат идораларига эмас, давлат идоралари халққа хизмат қилиши керак” тамойили асосида жамоатчилик назорати институтларини янада ривожлантиришга замин яратди. Бугунги кунда жамоатчилик назорати демократик ислоҳотларнинг самарадорлигини ошириш, фуқароларнинг давлат бошқарувидаги фаол иштирокини таъминлашда муҳим аҳамият касб этмоқда. Шу мақсадда Ўзбекистон Либерал-демократик партияси Сиёсий Кенгаши Ижроия қўмитаси ўз сайловолди дастуридан келиб чиқиб, 2025 йилга мўлжалланган жамоатчилик назорати тадбирлари режасини қабул қилди. Ушбу режа доирасида мамлакатнинг турли ҳудудларида ижтимоий-иқтисодий соҳаларда амалга оширилаётган ишлар самарадорлигини баҳолаш, аҳоли турмуш даражасига таъсир этувчи омилларни ўрганиш ишлари йўлга қўйилган.

Шунга мувофиқ, аҳолини озиқ-овқат маҳсулотлари билан узлуксиз таъминлаш, ички бозорда нарх-наво барқарорлигини сақлаш ҳамда соҳага инвестиция жалб этиш масалалари юзасидан ЎзЛиДеП Конимех туман Кенгаши депутатлари ва партия фаоллари томонидан жамоатчилик назорати ўтказилди.

Ўрганиш жараёнида туман ҳудудидаги Конимех деҳқон бозорида сотилаётган қишлоқ хўжалиги маҳсулотларининг сифати, сақланиш шароитлари, аҳоли учун яратилган имкониятлар ҳамда маҳсулотлар нархининг барқарорлиги атрофлича таҳлил этилди. Шунингдек, бозор фаолиятини ташкил этишда тадбиркорлар учун яратилган шарт-шароитлар, савдо майдонларининг санитария ҳолати ва хизмат кўрсатиш маданияти ҳам кўздан кечирилди.

Ўрганишда ЎзЛиДеП Конимех туман Кенгаши аппарат раҳбари З. Айдарова, депутатлар А. Худайбердиев, Э. Ташпанбетов ҳамда депутатлик гуруҳи раҳбари А. Жайнаров иштирок этди. Депутатлар жойлардаги муаммоларни ўрганиб, тадбиркорлар ва фуқаролар билан суҳбатлашдилар, озиқ-овқат маҳсулотлари нархининг ошишига сабаб бўлиши мумкин бўлган омилларни таҳлил қилдилар.

Тадбир якунида бозор инфратузилмасини янада такомиллаштириш, маҳсулотларни сақлаш учун замонавий совутгичли омборхоналар сонини кўпайтириш, тадбиркорлар учун қулай шарт-шароит яратиш ва аҳолига қулай нархларда маҳсулот етказиб бериш бўйича тегишли таклифлар ишлаб чиқилди.

Ўтказилган жамоатчилик назорати натижалари партиянинг ҳудудий кенгаши йиғилишида кўриб чиқилиб, аниқ амалий чоралар белгилаб олинди. Бу эса ЎзЛиДеПнинг халқ манфаатларини ҳимоя қилиш, жойларда ижтимоий адолат ва очиқликни таъминлаш йўлидаги изчил фаолиятининг навбатдаги амалий ифодаси бўлди.