Xalq deputatlari Termiz shahar Kengashining navbatdagi sessiyasiga tayyorgarlik ko‘rish, kun tartibiga kiritilgan masalalarni atroflicha muhokama qilish hamda tegishli sohalarda amalga oshirilayotgan ishlar samaradorligini tahlil etish maqsadida Kengash doimiy komissiyalarining qo‘shma yig‘ilishi bo‘lib o‘tdi.

Yig‘ilishda doimiy komissiyalar raislari, ekspert guruhi a’zolari, deputatlar, Kengash kotibiyati mas’ullari hamda tegishli soha rahbarlari ishtirok etdilar.

Kun tartibidagi asosiy masalalardan biri nogironligi bo‘lgan shaxslarni har tomonlama qo‘llab-quvvatlash, ularning huquq va qonuniy manfaatlarini himoya qilish, jamiyat hayotida faol ishtirok etishi uchun teng imkoniyatlar yaratish borasida amalga oshirilayotgan ishlar tahliliga bag‘ishlandi.
Mazkur masala yuzasidan shahar “Inson” ijtimoiy xizmatlar markazi direktori O.Jumayevning 2026-yilning 9 oyi davomida nogironligi bo‘lgan shaxslarni qo‘llab-quvvatlash yo‘nalishida amalga oshirilgan ishlar to‘g‘risidagi hisoboti tinglandi.

Hisobotda nogironligi bo‘lgan shaxslarning ijtimoiy himoyasini kuchaytirish, ularning ta’lim olishi, tibbiy xizmatlardan foydalanishi, davlat xizmatlaridan foydalanishda qulayliklar yaratish hamda kundalik hayotida duch kelayotgan muammolarini bartaraf etish borasida olib borilgan ishlar yuzasidan ma’lumotlar berildi.

Shuningdek, aholining ushbu qatlamiga ko‘rsatilayotgan ijtimoiy xizmatlarning manzilliligi va sifatini oshirish, yordamga muhtoj fuqarolarni aniqlash, ularning ehtiyojlarini o‘rganish hamda mavjud muammolarga individual yondashuv asosida yechim topish masalalariga alohida e’tibor qaratildi.

Muhokamalar davomida deputatlar tomonidan mazkur yo‘nalishdagi ishlarning samaradorligini yanada oshirish, nogironligi bo‘lgan shaxslarning murojaatlarini o‘z vaqtida ko‘rib chiqish, ular uchun yaratilgan imkoniyatlardan foydalanishdagi to‘siqlarni bartaraf etish hamda ijtimoiy xizmatlar sifatini yaxshilash yuzasidan fikr-mulohazalar bildirildi.

Ta’kidlanganidek, nogironligi bo‘lgan shaxslarni qo‘llab-quvvatlash faqat ijtimoiy yordam ko‘rsatish bilan cheklanib qolmasdan, ularning munosib hayot kechirishi, sifatli ta’lim va tibbiy xizmatlardan foydalanishi, jamiyatda o‘z o‘rnini topishi uchun zarur shart-sharoitlarni yaratishni ham qamrab olishi lozim.

Qo‘shma yig‘ilishda bildirilgan fikr va takliflar asosida mazkur yo‘nalishdagi ishlarni yanada takomillashtirish, mavjud muammolarni bartaraf etish hamda belgilangan vazifalar ijrosi ustidan deputatlik nazoratini kuchaytirish masalalariga e’tibor qaratildi.

Xalq deputatlari Termiz shahar Kengashi ijtimoiy himoyaga muhtoj fuqarolarning huquq va manfaatlarini ta’minlash, aholiga ko‘rsatilayotgan xizmatlar sifatini oshirish hamda har bir fuqaro uchun teng imkoniyatlar yaratishga qaratilgan ishlarni deputatlik nazorati doirasida izchil davom ettiradi.