Deputatlik so‘roviga asosan ichimlik suvi muammosi o‘rganildi

Xalq deputatlari Termiz tuman Kengashi deputatiga “Jo‘yjangal” mahallasi fuqarolari tomonidan hududdagi ichimlik suvi ta’minoti bilan bog‘liq muammo yuzasidan murojaatlar kelib tushgan.

Mazkur murojaat yuzasidan deputat tomonidan mas’ullar bilan birgalikda joyiga chiqqan holda o‘rganish olib borilib, hudud aholisini sifatli va uzluksiz ichimlik suvi bilan ta’minlashda mavjud muammolar aniqlangan.

Shundan so‘ng, fuqarolar murojaatlarini hal etish maqsadida tegishli mas’ullarga deputatlik so‘rovi yuborilib, muammoning sabablarini aniqlash hamda uni bartaraf etish bo‘yicha amalga oshirilayotgan ishlar yuzasidan yozma ma’lumot so‘ralgan.

Deputatlik so‘roviga tuman “Suv ta’minoti” bo‘limi tomonidan berilgan javobga ko‘ra, “Jo‘yjangal” mahallasida aholini ichimlik suvi bilan ta’minlash maqsadida 1,8 km suv tarmog‘i tortilgan.

Hozirda hududda suv ta’minotini yo‘lga qo‘yish uchun quduq qazish ishlari amalga oshirilmoqda. Qurilish tashkiloti tomonidan mazkur ishlar yakuniga yetkazilmagani sababli suv tarmog‘i orqali aholiga ichimlik suvi yetkazib berish imkoniyati to‘liq ta’minlanmagan.

Mas’ullar tomonidan quduq qazish ishlari yakunlanishi bilan “Jo‘yjangal” mahallasi aholisini toza ichimlik suvi bilan ta’minlash ma’lum qilingan.

Mazkur masala deputatlik nazoratida bo‘lib, ishlarning yakunlanishi va aholi uchun suv ta’minoti yo‘lga qo‘yilishi bo‘yicha nazorat davom ettiriladi.