Xalq deputatlari Sirdaryo viloyat Kengashining 32-Xalqobod saylov okrugi deputati R.Tursunmuradov O‘zbekiston Respublikasining "Mahalliy davlat hokimiyati to‘g‘risida"gi Qonunining 19¹-moddasi talablariga muvofiq saylov hududidagi “Quytosh” MFYda joylashgan, hozirda ta’mirlash va jihozlash ishlari yakuniga yetmagan 19-umumiy o‘rta ta’lim maktabidagi qurilish holatini o‘rgandi.
Mazkur maktab binosi «HOUSE GRAND» loyihachi tashkiloti va «Kapital Stroy Elegant» MCHJ pudratchi tashkiloti tomonidan barpo etilmoqda. Umumiy qiymati 9,5 mlrd so‘m bo‘lgan ushbu maktabda qurilish ishlari 2025 yilning aprel oyida boshlangan bo‘lib, u 2025 yilning noyabr oyida yakunlanishi belgilangan edi. Biroq, shunga qaramasdan, ob’yektdagi ishlar bugungi kunga qadar nihoyasiga yetkazilmaganligi ma’lum bo‘ldi.
O‘rganish davomida maktab binosining kadastr hujjatlari tayyorlanmagani va hududga TP (transformator) o‘rnatilgani, lekin maktab binosiga hali elektr toki kiritilmagani aniqlandi. Shuningdek, sport zalini ta’mirlash ishlari yakuniga yetkazilmagan, mini-sport maydonchasiga chimlar to‘liq yotqizilmagan va elektr tarmoqlari tortilmagan. Maktab ichidagi bolalar hojatxonalari uchun maxsus kanalizatsiya tizimlari qurish ishlari yakuniga yetkazilmagangi va binoda boshqa ko‘plab kamchiliklar mavjudligi ko‘zga tashlandi.
Deputat qurilish tashkiloti rahbari bilan suhbatlashganda, pudratchi qisqa muddatlar ichida mavjud kamchiliklarni bartaraf etishini ma’lum qildi.