Deputatlik vakolati va hokimlik mas’uliyati amalda

🇺🇿 Deputatlarning saylangan okruglarda fuqarolar qabullarini o‘tkazish jadvaliga muvofiq, xalq deputatlari Uchtepa tumani Kengashining “16-Algoritm” saylov okrugi deputati, ayni paytda Uchtepa tumani hokimi Bunyod Mamadjanov tomonidan Diyorobod mahallasi fuqarolari uchun navbatdagi sayyor qabul tashkil etildi.

🗂 Mazkur faoliyat O‘zbekiston Respublikasi Prezidentining 2024-yil 2-fevraldagi PF–27-sonli “Mahalliy davlat hokimiyati organlari faoliyatining samaradorligini oshirish chora-tadbirlari to‘g‘risida”gi Farmonida belgilangan “Kuchli Kengash, hisobdor va tashabbuskor hokim” tamoyilining amaliy ifodasi bo‘lib, aholi bilan ochiq muloqotni yo‘lga qo‘yish hamda hududlardagi muammolarni manzilli hal etishga xizmat qilmoqda.

💼 Qabulda tuman prokurori S.Muxtarov, tuman IIO FMB boshlig‘i, podpolkovnik A.Baxramov hamda xalq deputatlari Uchtepa tumani Kengashi kotibiyati mudiri Anvar Usmanov ishtirok etdi. Ochiq muloqot tarzida o‘tgan qabul davomida fuqarolar tomonidan uy-joy, kommunal xizmatlar, tadbirkorlik, ijtimoiy qo‘llab-quvvatlash, infratuzilma hamda obodonlashtirish masalalari yuzasidan murojaatlar bildirildi.

📊 Murojaatlar tahliliga ko‘ra, qabul davomida 2 ta murojaat bo‘yicha fuqarolarga amaldagi qonunchilik talablari asosida huquqiy tushuntirishlar berildi. Jumladan, fuqaro B.Po‘latovning mavsumiy savdo faoliyatini tashkil etish hamda fuqaro L.Kiselovaning uy-joyni xususiylashtirish masalasiga oid murojaatlari yuzasidan batafsil huquqiy izohlar taqdim etildi.

📇 Shuningdek, fuqaro G.Abduvaliyevaning davolanish uchun moddiy yordam ajratish hamda fuqaro M.Ahmadaliyevaning hududda piyodalar yo‘lagi qurish haqidagi murojaatlari amaliy yordam ko‘rsatish maqsadida nazoratga olinib, tegishli tashkilotlar bilan hamkorlikda hal etilishi belgilandi. Bundan tashqari, ko‘p qavatli uylar atrofidagi daraxtlarni tartibga keltirish, podval va tom qismlaridagi mavjud muammolarni bartaraf etish, shuningdek hududlarni obodonlashtirish bilan bog‘liq 3 ta masala yuzasidan mutasaddi tashkilotlarga muddatli topshiriqlar berildi hamda ularning ijrosi nazoratga olindi.

🗣 Qabul davomida bildirilgan har bir murojaat alohida o‘rganilib, mas’ul tashkilotlar kesimida tegishli vazifalar belgilandi. Fuqarolar tomonidan ko‘tarilgan masalalarning joyiga chiqib o‘rganilishi, amaliy yechim topishi va belgilangan muddatlarda ijro etilishi deputatlik nazoratida bo‘lishi alohida ta’kidlandi.

📝 Qabul yakunida barcha murojaatlar tegishliligi bo‘yicha ko‘rib chiqilib, mas’ul tashkilotlarga zarur ko‘rsatma va topshiriqlar berildi.