Xalq deputatlari G‘ozg‘on shahar Kengashi raisi Z.Ro‘ziyev hamda Kengash kotibiyat mudiri F.Hojiyev tomonidan shahardagi “Marmarobod” MFY hududida faoliyat yuritayotgan “Gazgan Stone” korxonasiga tashrif buyurilib, korxonadagi investitsiya jarayonlari, ishlab chiqarish faoliyati hamda mahsulot sifati joyida o‘rganildi.

O‘rganish jarayonida korxonaga jalb etilgan investitsiyalar samaradorligi, ishlab chiqarish quvvatlari, zamonaviy texnologiyalardan foydalanish darajasi, granit tosh mahsulotlarining sifati, tadbirkorlik subyektiga yaratilgan sharoitlar va mavjud muammolar tanqidiy-tahliliy asosda ko‘rib chiqildi.

 Shu bilan birga, O‘zbekiston Respublikasining “O‘zbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil to‘g‘risida”gi O‘RQ-440-sonli Qonuni (2017-yil 29-avgust) talablari asosida tadbirkorlik subyektlarining huquq va manfaatlarini himoya qilish, ular faoliyatiga to‘sqinlik qiluvchi omillarni bartaraf etish hamda investitsiya muhitini yaxshilash bo‘yicha amalga oshirilayotgan ishlar ham o‘rganildi.

Xususan: 

korxonaga kiritilgan investitsiyalar samaradorligi; 

ishlab chiqarish jarayonlarining tashkil etilishi; 

granit tosh mahsulotlarining sifati va standartlarga mosligi; 

tadbirkorlik subyektiga yaratilgan sharoitlar; 

yangi ish o‘rinlarini yaratish va aholi bandligini ta’minlash; 

tadbirkorlik faoliyatida mavjud muammolar va ularning yechimlari masalalari ko‘rib chiqildi. 

 Shuningdek, korxonaning hudud iqtisodiyotini rivojlantirishdagi o‘rni, ishlab chiqarish hajmini kengaytirish, mahsulotlarning raqobatbardoshligini oshirish va eksport salohiyatini mustahkamlash bo‘yicha imkoniyatlar muhokama qilindi.

O‘rganish yakunida investitsiya samaradorligini oshirish, ishlab chiqarish sifatini yaxshilash, tadbirkorlik subyektlarining huquqiy himoyasini kuchaytirish hamda yangi loyihalarni qo‘llab-quvvatlash bo‘yicha tegishli vazifalar belgilab olindi.

Mazkur o‘rganish ishlari hududda tadbirkorlik muhitini yaxshilash, investitsiyalarni keng jalb etish, sanoat ishlab chiqarishini rivojlantirish hamda yangi ish o‘rinlari yaratishga xizmat qiladi.