“Ayollar qanoti” faollari tomonidan targ‘ibot tadbiri o‘tkazildi

O’zLiDeP Termiz tumani Kengashi deputati, tadbirkor, “Ishbilarmon ayol – 2023” ko‘rik-tanlovi nominatsiyasi g‘olibi va faol ishtirokchisi Tursunoy Berdiyarova boshchiligida “Ayollar qanoti” faollari tomonidan muhim uchrashuv tashkil etildi.

Mazkur tadbir O‘zbekiston Respublikasi Prezidentining “2022–2026 yillarga mo‘ljallangan Yangi O‘zbekistonning taraqqiyot strategiyasi to‘g‘risida”gi Farmoni ijrosini ta’minlash, unda belgilangan ustuvor vazifalarni keng jamoatchilikka yetkazish va ayollar faolligini oshirish maqsadida o‘tkazildi.

Uchrashuv davomida Taraqqiyot strategiyasining ijtimoiy-iqtisodiy hayotdagi o‘rni, xususan:

xotin-qizlarni tadbirkorlikka keng jalb etish,

ularni o‘z biznesini tashkil etishda qo‘llab-quvvatlash,

oilaviy tadbirkorlik va hunarmandchilikni rivojlantirish,

yoshlarni zamonaviy kasblarga o‘qitish va ularning bandligini ta’minlash,

ijtimoiy himoyaga muhtoj ayollarga amaliy yordam ko‘rsatish

masalalari yuzasidan atroflicha fikr-mulohazalar bildirildi.

Deputat Tursunoy Berdiyarova o‘z nutqida ayollar faolligi va ularning siyosiy, ijtimoiy hamda iqtisodiy hayotdagi o‘rnini mustahkamlash bugungi kunda davlat siyosatining ustuvor yo‘nalishlaridan biri ekanini ta’kidladi. Shuningdek, “Ayollar qanoti” a’zolari tomonidan joylarda amalga oshirilayotgan ishlar, ayollar bandligini oshirishga qaratilgan loyihalar haqida ham batafsil ma’lumot berildi.

Tadbir yakunida ishtirokchilarga Taraqqiyot strategiyasi doirasida belgilangan vazifalarni amalga oshirish bo‘yicha amaliy ko‘rsatmalar berildi hamda mazkur yo‘nalishdagi faoliyatda “Ayollar qanoti”ning o‘rni va mas’uliyati alohida ta’kidlandi.