Xalq deputatlari tuman Kengashining 2026-yilga mo‘ljallangan ish rejasiga muvofiq O‘zbekiston Liberal demokratik partiyasidan saylangan deputat – tuman hokimi M.Mirabdullayev tomonidan tumanning “Do‘stlik” mahallasiga biriktirilgan xotin-qizlar faoli D.Jo‘rayevaning faoliyati bo‘yicha o‘rganish o‘tkazdi.

🔻O‘rganish davomida “Ayollar daftari”ga kiritilgan xotin-qizlar bilan ishlash, ularning ehtiyojlarini aniqlash, mavjud muammolarini bartaraf etish hamda ijtimoiy qo‘llab-quvvatlash choralarini manzilli tashkil etishga qaratilgan ishlarga alohida e’tibor qaratildi.

🔻Ayniqsa, “Ayollar daftari”ning 1-toifasiga kiritilgan xotin-qizlarning bandligini ta’minlash, ularning daromad manbalarini shakllantirish va iqtisodiy mustaqilligini oshirish masalalari ko‘rib chiqildi. Mazkur yo‘nalishda xotin-qizlarning imkoniyatlari va ehtiyojlaridan kelib chiqib, ularni ish bilan ta’minlashga qaratilgan chora-tadbirlar izchil davom ettirilmoqda.

🔻Ta’kidlash joizki, xotin-qizlar bandligini ta’minlash nafaqat ularning moddiy ahvolini yaxshilash, balki oila farovonligini oshirish, ijtimoiy faolligini kuchaytirish va jamiyatda o‘z o‘rnini topishi uchun ham muhim ahamiyatga ega. Deputat tomonidan xotin-qizlar faoli bilan hamkorlikda har bir ehtiyojmand ayolning muammosini individual o‘rganish, bandlikka ko‘maklashish choralarini samarali tashkil etish hamda amalga oshirilayotgan ishlarning natijadorligini ta’minlash muhimligi ta’kidlandi.

🔻Shuningdek, xotin-qizlarni qo‘llab-quvvatlashga qaratilgan chora-tadbirlarning ijrosini muntazam kuzatib borish, mavjud muammolarni o‘z vaqtida aniqlash va ularning yechimi bo‘yicha mas’ullar bilan hamkorlikni kuchaytirish zarurligi qayd etildi.