3-SONLI TEXNIKUM FAOLIYATI O‘RGANILDI

O‘zbekiston Respublikasi Oliy Majlisi Senatining Fan, ta’lim va sog‘liqni saqlash masalalari qo‘mitasi raisi O. Mamatkarimov, Namangan viloyati Kengashi Kotibiyati mudiri T. Gapparov, Xalq deputatlari Namangan shahar Kengashi raisi R. Isakov, shahar Kengashi Kotibiyati mudiri N. Ubaydullayev hamda Kotibiyat bosh mutaxassislari A. Nurmatov va M. Abdulmajidov ishtirokidagi ishchi guruh tomonidan Namangan shahridagi 3-sonli texnikum faoliyati o‘rganildi.

O‘rganish davomida texnikumda ta’lim jarayonining tashkil etilishi, o‘quvchilar uchun yaratilgan shart-sharoitlar, muassasaning moddiy-texnik bazasi, mavjud muammolar hamda ularni bartaraf etish bo‘yicha amalga oshirilayotgan ishlar ko‘rib chiqildi.

Shuningdek, ta’lim sifatini oshirish, o‘quvchilarni zamonaviy kasb-hunarlarga o‘qitish, amaliy ko‘nikmalarini rivojlantirish, mehnat bozori talablariga mos mutaxassislar tayyorlash va bitiruvchilar bandligini ta’minlash borasidagi ishlar yuzasidan fikr almashildi.

Mazkur o‘rganish Mahalliy Kengash deputati faoliyatining eng muhim 24 ta yo‘nalishi bo‘yicha tavsiyalar hamda Kengashning 162 ta qonun hujjatini doimiy komissiyalar kesimidagi taqsimoti doirasida ta’lim sifati, yoshlarni kasb-hunarga yo‘naltirish va aholi bandligini ta’minlash vazifalari bilan uzviy bog‘liqdir.

Jumladan, “Ta’lim to‘g‘risida”gi O‘zbekiston Respublikasi Qonuni (O‘RQ-637-son, 2020-yil 23-sentabr) hamda “Aholi bandligi to‘g‘risida”gi O‘zbekiston Respublikasi Qonuni (O‘RQ-642-son, 2020-yil 20-oktabr) talablaridan kelib chiqib, kasbiy ta’lim sifatini oshirish va yoshlarning mehnat faoliyatiga kirishish imkoniyatlarini kengaytirish masalalariga e’tibor qaratildi.

O‘rganish yakunida aniqlangan masalalar yuzasidan ta’lim sifatini yanada yaxshilash, texnikumning moddiy-texnik bazasidan samarali foydalanish hamda o‘quvchilarni kasb-hunarga tayyorlash va ularning bandligini ta’minlash bo‘yicha mas’ullarga tegishli tavsiya va ko‘rsatmalar berildi.