Navbatdagi deputatlik o‘rganishi 16-Ipak yo‘li saylov okrugi hududidagi Ipak yo‘li mahallasida joylashgan, 175 nafar tarbiyalanuvchini qamrab olgan 8-maktabgacha ta’lim tashkilotida o‘tkazildi.

O‘rganishda Xalq deputatlari Marg‘ilon shahar Kengashi kotibiyat mudiri A.Ermatov, 16-Ipak yo‘li saylov okrugi deputati, Ijtimoiy soha, yoshlar siyosati, madaniyat va sport masalalari bo‘yicha doimiy komissiya raisi A.Mahkamov hamda kotibiyat bosh mutaxassisi Z.Yakubova ishtirok etdilar.

Deputatlar tomonidan O‘zbekiston Respublikasining 2019-yil 16-dekabrdagi O‘RQ–595-son “Maktabgacha ta’lim va tarbiya to‘g‘risida”gi Qonuni ijrosi, xususan, maktabgacha ta’lim tashkilotlarida bolalar uchun yaratilgan sharoitlar, ta’lim-tarbiya jarayonining tashkil etilishi hamda qonunda belgilangan davlat kafolatlarining amalda ta’minlanishi bilan bog‘liq masalalarga e’tibor qaratildi.

O‘rganish davomida muassasaning kundalik faoliyati, tarbiyalanuvchilar uchun yaratilgan sharoitlar hamda mavjud infratuzilma holati ko‘zdan kechirildi. Oʻrganish kunida tashkilotda ichimlik suvi mavjud emasligi ma’lum bo‘ldi.

Mazkur holat bolalar salomatligi va xavfsizligini ta’minlash, maktabgacha ta’lim tashkilotida sanitariya-gigiyena talablariga rioya etish nuqtayi nazaridan alohida e’tibor talab etishi qayd etildi.

Aniqlangan muammoni bartaraf etish maqsadida o‘rganishning o‘zidayoq shahar suv ta’minoti bo‘limi bilan bog‘lanilib, masalani hal etish yuzasidan tegishli choralar ko‘rish masalasi muhokama qilindi.

Deputatlik o‘rganishi davomida aniqlangan kamchilikni bartaraf etish, muassasani ichimlik suvi bilan ta’minlash hamda bolalar uchun zarur va xavfsiz sharoitlarni yaratish masalasi deputatlik nazoratiga olindi.

Bunday o‘rganishlar joylardagi muammolarni bevosita aniqlash, mas’ul tashkilotlar e’tiborini mavjud kamchiliklarga qaratish va qonun hujjatlarida belgilangan talablarning amaliy ijrosini ta’minlashga xizmat qilmoqda.