Xalq deputatlar Margʻilon shahar Kengashi deputatlari M.X.Mirzaev va M.S.Mirzaev hududlarda bo‘lib, aholi bandligini ta’minlash, tadbirkorlikni rivojlantirish uchun yaratilayotgan sharoitlar, ajratilayotgan mablag‘larning samaradorligi hamda fuqarolarni qiynayotgan muammolarni o‘rgandilar.

17-Navro‘z saylov okrugi hududidagi Navro‘z MFY aholisi tomonidan deputatlarga elektr energiyasi ta’minoti masalasida yoʻllangab murojaat e’tiboridan chetda qolmadi. Mazkur muammoni hal etish maqsadida deputatlar M.X.Mirzayev, M.S.Mirzayev va viloyat Kengashi deputati Sh.X.Ermatov tomonidan bir necha oy davomida tegishli tashkilotlar bilan hamkorlikda o‘rganishlar olib borildi va amaliy choralar belgilandi.

Natijada viloyat hokimligining bevosita aralashuvi bilan ushbu hududdagi mavjud eski yog‘och ustunlar o‘rniga bugungi kunda 60 dona yangi, talab darajasidagi beton elektr ustunlari olib kelinib, o‘rnatilmoqda.

Mazkur ishlar aholi xonadonlari va ko‘chalarini barqaror elektr energiyasi bilan ta’minlash, shuningdek, hududdagi tadbirkorlik subyektlari faoliyati uchun zarur sharoitlarni yaxshilashga xizmat qiladi.

Ayniqsa, tadbirkorlar tomonidan ushbu ishlar ijobiy qabul qilinmoqda. Chunki hududda yangi korxonalar va loyihalarning ishga tushirilishi, aholi bandligining ta’minlanishi, oilalar daromadlarining oshishi hamda kambag‘allikni qisqartirishda barqaror elektr ta’minoti muhim omillardan biridir.

Deputatlar tomonidan hududda amalga oshirilayotgan ishlarning sifati va belgilangan chora-tadbirlarning ijrosi doimiy nazoratga olingan. Asosiy maqsad esa aholining murojaatlarini faqat o‘rganish bilan cheklanib qolmasdan, ularni amaliy natijaga aylantirishdan iborat.