Xalq deputatlari tuman Kengashining 2026-yilga mo‘ljallangan ish rejasiga muvofiq O‘zbekiston “Milliy tiklanish” demokratik partiyasidan saylangan deputat J.Abdixayomova tomonidan tumanning “Markaziy” mahallasidagi Ibn Sino ko‘chasi ichki yo‘lining holati mahalla raisi ishtirokida o‘rganildi.

🔺O‘rganish davomida mazkur ichki yo‘lning aholi uchun muhim qatnov yo‘nalishlaridan biri ekani, kundalik hayotda fuqarolar tomonidan muntazam foydalanilishi inobatga olindi. Yo‘lning ayrim qismlarida asfalt qoplamasi bilan bog‘liq muammolar mavjudligi, ayniqsa, yog‘ingarchilik mavsumida aholi uchun qo‘shimcha noqulayliklar keltirib chiqarishi mumkinligi qayd etildi.

Xalq deputatlari tuman Kengashining mart oyidagi tegishli qarori bilan mazkur ichki yo‘lning 250 metr qismida asfaltlashtirish ishlari amalga oshirilishi belgilangan. Biroq qaror qabul qilinganidan buyon qariyb 6 oy vaqt o‘tganiga qaramasdan, belgilangan yo‘l qismini asfaltlashtirish ishlari boshlanmagani aniqlandi.

🔺Bu holat yuzasidan mahalla aholisi ham o‘z noroziligini bildirib, yo‘lni ta’mirlash ishlari kechikayotganidan xavotir bildirgan. Ayniqsa, kuzgi yog‘ingarchiliklar boshlanishi bilan yo‘lning mavjud holati yanada murakkablashishi, aholining harakatlanishi uchun noqulayliklar yuzaga kelishi mumkinligi ta’kidlandi.

🔺Deputat tomonidan Kengash qarorida belgilangan vazifalarning o‘z vaqtida va sifatli bajarilishi zarurligi qayd etilib, yog‘ingarchilik mavsumi boshlanishmasdan asfaltlashtirish ishlarini amalga oshirish choralarini ko‘rish zarurligi ta’kidlandi. Mazkur holat bo‘yicha mas’ullarga deputat so‘rovi chiqarilishi belgilandi.