Xalq deputatlari Bo‘stonliq tumani Kengashning 2026-yilga mo‘ljallangan ish rejasiga muvofiq O‘zbekiston Ekologik partiyasidan saylangan deputat A.Abdujamilovga biriktirilgan kotibiyat xodimi N.Kurganova tomonidan Respublika Ma’naviyat va ma’rifat markazi tuman bo‘linmasida yaratilgan shart-sharoitlar hamda muassasaning faoliyati o‘rganildi.

🟢O‘rganish davomida markazda aholining, ayniqsa, yoshlarning ma’naviy-ma’rifiy dunyoqarashini yuksaltirish, ularning bo‘sh vaqtini mazmunli tashkil etish, kitobxonlik madaniyatini oshirish va milliy qadriyatlarga hurmat ruhida tarbiyalashga qaratilgan ishlar bilan tanishildi.

Markazda foydalanuvchilar uchun kutubxona tashkil etilgan bo‘lib, unda turli mavzulardagi badiiy, ilmiy-ma’rifiy va ijtimoiy-siyosiy adabiyotlar jamlangan. Kutubxona yoshlar va aholi vakillarining kitob mutolaasi bilan shug‘ullanishi, bilim va dunyoqarashini kengaytirishi uchun qulay imkoniyat yaratadi.

Shuningdek, markazda shaxmatga qiziquvchilar uchun shaxmat xonasi tashkil etilgan. Mazkur xonada yoshlarning intellektual salohiyatini oshirish, mantiqiy fikrlash qobiliyatini rivojlantirish va bo‘sh vaqtlarini mazmunli o‘tkazishga alohida e’tibor qaratilgan.

Markazda tarixiy-madaniy merosimizni keng targ‘ib qilish maqsadida jadidchilar burchagi ham tashkil etilgan. Unda jadidchilik harakati vakillarining hayoti, ijodiy va ma’rifiy faoliyati, xalqning ma’naviy taraqqiyotiga qo‘shgan hissasi haqida ma’lumotlar joylashtirilgan. Mazkur burchak yoshlarni milliy tariximizni chuqur o‘rganishga, ma’rifatparvar ajdodlarimizning ilmiy va ma’naviy merosidan ibrat olishga xizmat qilmoqda.

🟢O‘rganish jarayonida markazda tashrif buyuruvchilar uchun zarur sharoitlar yaratilgani, xonalarning jihozlanishi va ulardan samarali foydalanish imkoniyatlari mavjudligi qayd etildi. Umuman, markazda yaratilgan sharoitlar yaxshi darajada ekani, ma’naviy-ma’rifiy tadbirlar va aholi bilan ishlash uchun zarur imkoniyatlar ta’minlangani ta’kidlandi.

🟢Markaz faoliyatini yanada takomillashtirish, kitobxonlikni keng targ‘ib qilish, yoshlarni intellektual va ma’naviy rivojlantirishga qaratilgan tadbirlarni ko‘paytirish hamda jadidlar merosini keng ommaga yetkazish borasidagi ishlarni izchil davom ettirish muhimligi qayd etildi.