Xalq deputatlari Guliston shahar Kengashi deputati S. Bektemirov hamda Kengash kotibiyati bosh mutaxassislari N. Abdumoʻminova va J. Ashurboyev tomonidan K-3 kanali bo‘yida aholi dam olishi uchun tashkil etilgan hududda amalga oshirilgan obodonlashtirish ishlari hamda tungi yoritish tizimining holati joyiga chiqqan holda o‘rganildi.

Ma'lumki, Xalq deputatlari Guliston shahar Kengashining avvalgi sessiyalaridan birida deputat S. Bektemirov tomonidan mazkur hududdagi tungi yoritish tizimida mavjud muammolar, jumladan, yoritish ustunlarining bir qismi yaroqsiz holga kelgani va ayrim metall konstruksiyalarning talon-toroj qilingani sababli yoritish tizimi to‘liq ishlamayotgani masalasi ko‘tarilgan edi.

O‘tkazilgan o‘rganish davomida ushbu hududda zamonaviy, quyosh panellari orqali quvvat oluvchi (avtonom) LED yoritish chiroqlari o‘rnatilgani, tungi yoritish tizimi bosqichma-bosqich tiklanib, aholi uchun xavfsiz va qulay sharoit yaratish borasida amaliy ishlar amalga oshirilgani aniqlandi.

Deputatlik nazorati doirasida mazkur hududdagi obodonlashtirish va yoritish tizimining barqaror faoliyatini ta'minlash yuzasidan monitoring ishlari izchil davom ettiriladi.