Uchrashuvda Xalq deputatlari Termiz shahar Kengashi raisi D.Normuradova, Kengash kotibiyati mudiri A.Ashurov, Kengash deputatlari X.Xolmuminov hamda I.Tangirov, Termiz shahar hokimi o‘rinbosari K.Ashurov, O‘zXDP Termiz shahar Kengashi raisi Z.Doniyorova, O‘zbekiston mahallari uyushmasi Termiz shahar bo‘limi boshlig‘i F.Abdumannotov, Kengash kotibiyati bosh mutaxassisi A.Temirov, mahalla faollari hamda saylovchilar ishtirok etdi.

Ushbu tadbir shunchaki uchrashuv emas, balki qonun ustuvorligining amaldagi ifodasidir. Muloqot O‘zbekiston Respublikasining «Xalq deputatlari viloyat, tuman va shahar Kengashi deputatining maqomi to‘g‘risida»gi Qonunining 7-moddasi asosida tashkil etildi.

Uchrashuv avvalida shahar Kengashi kotibiyat bosh mutaxassisi tomonidan deputat T.Berdiyevning o‘tgan chorakdagi hisoboti o‘qib eshittirildi.

Xususan, saylovchilar manfaatlarini himoya qilish maqsadidada tegishli vakolatli idoralarga yuborilgan so‘rovlar tahlili, shahar Kengashi sessiyalarida ko‘rib chiqilgan masalalar va qabul qilingan normativ-huquqiy hujjatlarning ijro holati, hududda obodonlashtirish ishlari va maishiy chiqindilarni o‘z vaqtida olib chiqishni tizimlashtirish, bolalar maydonchalarini zamonaviylashtirish va kommunal infratuzilmani yaxshilash bo'yicha amalga oshirilgan ishlar yuzasidan ma'lumot berildi.

Shuningdek, uchrashuv davomida Termiz shahar hokimining o‘rinbosari K.Ashurov ham so‘zga chiqib, shaharda joriy yil davomida amalga oshirilgan keng ko‘lamli bunyodkorlik ishlari haqida qisqacha ma’lumot berib o‘tdi.

"Deputat saylovchilari oldida har bir qilgan ishi uchun hisobdor bo'lishi shart. Bugun saylovchilarimiz o‘z deputatining II chorakdagi ishlarini eshitdilar, o‘zlarini qiynayotgan muammolarni o‘rtaga tashladilar. Bunday ochiq muloqotlar aholining haqiqiy muammolariga yechim topish va davlat idoralari faoliyatini to‘g‘ri baholash imkonini beradi"- dedi Kengash raisi D.Normuradova.