Mahalladagi xotin-qizlar faoli faoliyati va ta’lim muassasasi holati o‘rganildi

Xalq deputatlari Qiziriq tumani Kengashi deputati M. Juraqulova “Rabotak” mahallasida bo‘lib, mahallada xotin-qizlar faoli tomonidan amalga oshirilayotgan ishlar holati bilan yaqindan tanishdi. O‘rganish jarayonida xotin-qizlarning bandligini ta’minlash, ijtimoiy himoyaga muhtoj ayollar bilan manzilli ishlash, “Ayollar daftari” doirasida ko‘rilayotgan chora-tadbirlar, muammolarni joyida aniqlash va hal etish mexanizmlari atroflicha muhokama qilindi.

Shuningdek, deputat mahalla hududida joylashgan umumta’lim maktabiga tashrif buyurib, o‘quvchilar bilan ochiq va samimiy muloqot o‘tkazdi. Uchrashuv davomida ta’lim jarayonining sifati, o‘quvchilarning bo‘sh vaqtini mazmunli tashkil etish, sport va jismoniy tarbiya mashg‘ulotlari uchun yaratilgan sharoitlar yuzasidan fikr almashildi. Maktab sport zalida yaratilgan sharoitlar ko‘zdan kechirilib, o‘quvchilarning sog‘lom turmush tarziga bo‘lgan qiziqishini oshirishga qaratilgan ishlar muhimligi ta’kidlandi.

Bundan tashqari, ta’lim muassasasining isitish tizimi holati o‘rganilib, mavsumiy tayyorgarlik darajasi, sinfxonalar va sport zallarining qish mavsumiga mosligi ko‘zdan kechirildi. Aniqlangan kamchiliklar yuzasidan mutasaddi tashkilotlar bilan hamkorlikda bartaraf etish bo‘yicha taklif va tavsiyalar berildi.

Tashrif yakunida mahallada ijtimoiy sohani yanada rivojlantirish, xotin-qizlarni qo‘llab-quvvatlash tizimini takomillashtirish hamda ta’lim muassasalarida o‘quvchilar uchun yaratilgan sharoitlarni yaxshilash bo‘yicha belgilangan vazifalarning ijrosi deputat nazoratiga olindi.

Qiziriq tumani Kengashi Axborot xizmati 

Rasmiy sahifalarimiz👇

Telegram (https://t.me/+h07HeUv_IP44MmUy) | Facebook (https://www.facebook.com/?ref=homescreenpwa) | E-kengash (https://kengash.gov.uz/qiziriq) |Instagram (https://www.instagram.com/xalqdep_qiziriqtumani_kengashi?utm_source=qr&igsh=MjJ2OG4xOTh0dHY3)