Ayollar muammolarini manzilli hal etish, huquqiy himoyani kuchaytirish va oilalarda sog‘lom muhitni mustahkamlash — deputatlik nazoratida.

Xotin-qizlarning huquq va qonuniy manfaatlarini himoya qilish, tazyiq va zo‘ravonlikning oldini olish hamda ijtimoiy ko‘makka muhtoj ayollarni qo‘llab-quvvatlash borasidagi ishlar mahallalarda olib borilayotgan nazorat-tahlil tadbirlarining muhim yo‘nalishlaridan biridir.

Shu maqsadda Xalq deputatlari Termiz shahar Kengashining 7-“Bog‘ishamol” saylov okrugi deputati Sh.Allamarudova hamda Kengash kotibiyati bosh mutaxassisi R.Mamashukurov tomonidan “Bog‘ishamol” mahallasida xotin-qizlar faoli faoliyati o‘rganildi.
O‘rganish davomida nimalar tahlil qilindi?

“24 ta muhim yo‘nalish” doirasida O‘zbekiston Respublikasining 2019-yil 2-sentabrdagi O‘RQ–561-sonli “Xotin-qizlarni tazyiq va zo‘ravonlikdan himoya qilish to‘g‘risida”gi Qonuni talablari asosida mahallada amalga oshirilayotgan ishlar ko‘rib chiqildi.

Jumladan:

🔹 xotin-qizlarning muammolarini aniqlash va ular bilan manzilli ishlash;

🔹 ijtimoiy himoyaga muhtoj ayollarni qo‘llab-quvvatlash;

🔹 tazyiq va zo‘ravonlikka uchragan xotin-qizlarning huquqiy hamda ijtimoiy himoyasini ta’minlash;

🔹 fuqarolar murojaatlarini o‘rganish va huquqiy savodxonlikni oshirish;

🔹 oilaviy nizolarning oldini olish hamda murakkab hayotiy vaziyatga tushib qolgan ayollarga ko‘maklashish masalalariga alohida e’tibor qaratildi.

📌 O‘rganish yakunida aniqlangan masalalar yuzasidan tegishli tavsiya va takliflar bildirilib, xotin-qizlar bilan individual ishlashni kuchaytirish, ularning muammolariga o‘z vaqtida yechim topish va belgilangan vazifalar ijrosini samarali tashkil etish bo‘yicha kelgusidagi vazifalar belgilab olindi.

O‘rganish natijalari va takliflar umumlashtirilib, tegishli doimiy komissiyada dastlabki muhokamadan o‘tkazish hamda Xalq deputatlari Termiz shahar Kengashining navbatdagi sessiyasi kun tartibiga kiritish uchun taqdim etiladi.

Deputatlik nazoratining maqsadi — xotin-qizlarning muammolarini aniqlash bilangina cheklanmay, ularning huquqlarini himoya qilish va amaliy yordam ko‘rsatilishiga ko‘maklashishdir.