Mahallada 300 ta xonadonni toza ichimlik suvi bilan ta’minlashga mo‘ljallangan yirik loyiha ishlari boshlandi. Mazkur loyiha amalga oshirilishi natijasida ko‘plab oilalarning ichimlik suvi ta’minoti yaxshilanib, aholining kundalik ehtiyojlarini ta’minlashda muhim qulaylik yaratiladi.

Shuningdek, hududda 90 o‘ringa mo‘ljallangan davlat maktabgacha ta’lim tashkiloti qurib bitkazilib, hozirda foydalanishga topshirishga tayyor holatga keltirilgan. Zamonaviy bog‘chaning ishga tushirilishi mahalladagi maktabgacha yoshdagi bolalar uchun munosib sharoit yaratish bilan birga, ota-onalarga ham katta qulaylik beradi.

Bundan tashqari, “Tashabbusli budjet” loyihasi doirasida mahalladagi 3 kilometr yo‘l asfalt qilindi. Bu esa aholining erkin va xavfsiz harakatlanishi, transport qatnovining yaxshilanishiga xizmat qilmoqda.

Mazkur bunyodkorlik va obodonlashtirish ishlari bilan tuman Kengashi deputatlari Q. Chorshanbiyev, D. Shoimqulova va R. Mengziyayevalar yaqindan tanishib, amalga oshirilayotgan loyihalarning borishi, yaratilayotgan sharoitlar hamda aholi uchun kutilayotgan qulayliklarni ko‘zdan kechirdilar.

Yuksalish mahallasidagi bunday amaliy ishlar hududning yanada obod qiyofa kasb etishi va aholi farovonligini oshirishga xizmat qilmoqda.