O‘zbekiston Respublikasi Prezidentining PQ–406-son qarori, Oliy Majlis Senati Kengashining KQ–35-V-son qarori hamda mahalliy Kengash deputati faoliyatining eng muhim yo‘nalishlari bo‘yicha belgilangan 24 ta tavsiya ijrosi doirasida Xalq deputatlari Marg‘ilon shahar Kengashi kotibiyat mudiri A.Ermatov, 21-B.Marg‘iloniy saylov okrugi deputati R.Alijonova hamda deputatga biriktirilgan kotibiyat bosh mutaxassisi Z.Yakubova tomonidan Yangi bog‘ mahallasida o‘rganish ishlari olib borildi.

O‘rganish jarayonida mahalladagi hokim yordamchisi tomonidan amalga oshirilayotgan ishlarning samaradorligi, xususan, aholi bandligini ta’minlash, tadbirkorlikni rivojlantirish, oilalar daromadini oshirish va fuqarolarni kambag‘allikdan chiqarish borasidagi ishlar atroflicha tahlil qilindi.

Ma’lumotlarga ko‘ra, Yangi bog‘ mahallasida 6 250 nafar aholi istiqomat qiladi. Hududda 814 ta xonadon, 1 472 ta oila mavjud bo‘lib, iqtisodiy faol aholi soni 2 176 nafarni tashkil etadi. Ishsizlar soni 54 nafar yoki 3,8 foizni tashkil qilmoqda.

Mahalladagi ijtimoiy-iqtisodiy holatni yaxshilash borasida ham muayyan ishlar amalga oshirilgan. Jumladan, ijtimoiy reyestrga kiritilgan 105 ta oilaning 39 tasi davlat ta’minotida, 57 tasi kambag‘al, 9 tasi esa kambag‘allik chegarasidagi oilalar sifatida qayd etilgan.

Aholining daromad manbalarini kengaytirish va kambag‘allikni qisqartirish maqsadida 4 ta oilaviy tadbirkorlik krediti ajratilgan bo‘lib, ularning 2 tasi kambag‘al oilalarga to‘g‘ri keladi. Shuningdek, 3 ta subsidiya va ssuda, 11 ta kasb-hunarga o‘qitish vaucheri, 7 ta mikroloyiha amalga oshirilgan. Mikrol loyihalarning 3 tasi yuridik, 4 tasi jismoniy shaxslar hissasiga to‘g‘ri keladi.

Bandlikni ta’minlash yo‘nalishida 16 nafar fuqaro o‘zini o‘zi band qilgan, 11 nafar fuqaro doimiy ishga joylashtirilgan. Jumladan, doimiy ishga joylashtirilganlarning 3 nafari kambag‘al oilalar vakillaridir. O‘zini o‘zi band qilgan 16 nafar fuqaroning 8 nafari ham kambag‘al oilalar toifasiga mansub.

O‘rganish davomida hokim yordamchisining faoliyatida tadbirkorlik tashabbuslarini qo‘llab-quvvatlash, aholini kasb-hunarga yo‘naltirish, ishsiz fuqarolarni band qilish hamda kambag‘al oilalarning daromad manbalarini shakllantirish masalalariga alohida e’tibor qaratilayotgani qayd etildi.

Shuningdek, ushbu yo‘nalish bilan bevosita bog‘liq bo‘lgan O‘zbekiston Respublikasining “Tadbirkorlik faoliyati erkinligining kafolatlari to‘g‘risida”gi O‘RQ–328-son Qonuni ijrosi ham o‘rganildi. Mazkur qonun tadbirkorlik faoliyatini amalga oshirish uchun huquqiy kafolatlarni ta’minlash, tadbirkorlik subyektlarining huquq va qonuniy manfaatlarini himoya qilish hamda ularning faoliyat yuritishi uchun qulay shart-sharoitlar yaratishga qaratilgan.

Deputatlik nazorati davomida hokim yordamchisiga aholining, ayniqsa kambag‘al oilalarning tadbirkorlik tashabbuslarini qo‘llab-quvvatlash, ajratilgan kredit, subsidiya va vaucherlarning maqsadli va samarali yo‘naltirilishini ta’minlash, yaratilgan imkoniyatlarning amaliy natijasini nazorat qilish yuzasidan tegishli tavsiyalar berildi.

Bunday o‘rganishlar davlat dasturlari va qonunchilik hujjatlarida belgilangan vazifalarning mahalla darajasida qay darajada amaliyotga tatbiq etilayotganini aniqlash, mavjud muammolarni joyida ko‘rib chiqish hamda aholini kambag‘allikdan chiqarish bo‘yicha ishlar samaradorligini oshirishga xizmat qiladi.