Xalq deputatlari Tuproqqal’a tuman Kengashining navbatdagi qarorida tuman hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari S.Sultanovning 2026-yil I choragida amalga oshirgan ishlari yuzasidan hisoboti ko‘rib chiqildi.

Hisobotda tumanning ijtimoiy-iqtisodiy rivojlanishi bo‘yicha muhim ko‘rsatkichlar qayd etildi. Jumladan, xizmat ko‘rsatish hajmi 136,9 milliard so‘mni tashkil etib, o‘sish sur’ati 130,4 foizga yetdi. Mahalliy byudjet daromadlari rejasi 128,3 foizga bajarilib, 19,6 milliard so‘m tushum shakllantirildi.

Bandlikni ta’minlash borasida ham ijobiy natijalarga erishilib, I chorak davomida 491 nafar fuqaro ish bilan ta’minlandi. Tizimli islohotlar natijasida tumandagi ishsizlik darajasi 11,5 foizdan 4,5 foizgacha kamaygani ta’kidlandi.

Shuningdek, “Xorazm shakar” MCHJ faoliyatidagi xomashyo ta’minoti bilan bog‘liq muammolar, eksport ko‘rsatkichlari hamda yirik soliq to‘lovchilar faoliyati tanqidiy tahlil qilinib, mas’ullarga aniq vazifalar yuklatildi.

Qarorga ko‘ra, kambag‘allik darajasini yil yakuniga qadar 2,1 foizgacha kamaytirish, eksport hajmini oshirish va sanoat korxonalarini qo‘llab-quvvatlash bo‘yicha ishlar davom ettiriladi.15:41