Yig‘ilishni doimiy komissiya raisi A.Mahkamov olib bordi. Unda shuningdek, shahar Kengashi kotibiyati mudiri A.Ermatov ham ishtirok etdi.

Yig‘ilishda “Inson” ijtimoiy xizmatlar markazi tomonidan amalga oshirilayotgan ishlar yuzasidan hisobot tinglandi.

Ta’kidlanganidek, markaz faoliyati O‘zbekiston Respublikasi Prezidentining 2023-yil 1-iyundagi PF-82-son Farmoni asosida yo‘lga qo‘yilgan bo‘lib, aholining ijtimoiy himoyaga muhtoj qatlamlarini qo‘llab-quvvatlash, manzilli ijtimoiy xizmat va yordamlarni ko‘rsatish tizimini takomillashtirishga xizmat qilmoqda.

Bugungi kunda mahallalarda ijtimoiy xodimlar tomonidan 100 dan ortiq turdagi xizmat va yordamlar ko‘rsatilmoqda. Ijtimoiy reyestr asosida oilalar “davlat ta’minotidagi”, “kambag‘al” hamda “kambag‘allik chegarasidagi” toifalarga ajratilib, ularga mos ravishda manzilli yordamlar ko‘rsatib kelinmoqda.

Ma’lumotlarga ko‘ra, 2026-yil 1-may holatiga ko‘ra, shaharda minglab oilalar bolalar nafaqasi va moddiy yordam bilan qamrab olingan. Shuningdek, Ramazon oyi munosabati bilan 5 mingdan ortiq oilaga bir martalik moddiy yordam ajratilgan.

Nogironligi bo‘lgan shaxslarni qo‘llab-quvvatlash, ularga reabilitatsiya vositalari yetkazib berish, kunduzgi parvarish maskanlarini tashkil etish, yolg‘iz keksalarga ijtimoiy xizmatlar ko‘rsatish borasida ham tizimli ishlar amalga oshirilmoqda.

Yig‘ilish davomida “Saxovat va ko‘mak” jamg‘armasi mablag‘lari hisobidan ehtiyojmand fuqarolarga ko‘rsatilayotgan yordamlar, uy-joy, davolanish hamda ijtimoiy qo‘llab-quvvatlash yo‘nalishlaridagi ishlar ham atroflicha ko‘rib chiqildi.

Yakunda, jarayonda bo‘lgan arizalar yuzasidan tegishli qarorlar qabul qilish hamda ehtiyojmand fuqarolarga amaliy yordam ko‘rsatish masalalari muhokama qilindi.