Xalq deputatlari tuman Kengashi deputati O‘.Axmedov Fayziobod mahallasida aholi uchun yaratilgan infratuzilma obyektlarining holatini o‘rgandi. Tashrif davomida deputat mahallada yaqinda qurib bitkazilgan piyodalar yo‘lakchasini ko‘zdan kechirib, unda bajarilgan qurilish ishlarining sifati, qurilish me’yorlariga muvofiqligi hamda aholi uchun yaratilgan qulayliklar bilan tanishdi. Shuningdek, mahalla fuqarolari bilan muloqot o‘tkazilib, yangi piyodalar yo‘lakchasining aholi, ayniqsa, bolalar, keksalar va nogironligi bo‘lgan shaxslarning xavfsiz harakatlanishini ta’minlashdagi ahamiyati yuzasidan fikr-mulohazalar tinglandi. Fuqarolar tomonidan bildirilgan taklif va mulohazalar qayd etilib, ularni amaliy hal etish yuzasidan tegishli mas’ullarga tavsiyalar berildi. Deputat tomonidan qurilish ishlarining sifatini doimiy nazorat qilish, mavjud kamchiliklarni o‘z vaqtida bartaraf etish
hamda mahallada obodonlashtirish ishlarini izchil davom ettirish muhimligi alohida ta’kidlandi. Mazkur o‘rganishlar mahallalarda amalga oshirilayotgan bunyodkorlik ishlari ustidan deputatlik nazoratini kuchaytirish, aholi uchun xavfsiz va qulay muhit yaratish hamda hududlarning infratuzilmasini yanada rivojlantirishga xizmat qiladi.