Urganch shahar Do‘stlik mahalla binosida mahalla deputati Xalq deputatlari shahar Kengashi raisi, deputat P.Ro‘ziboyev o‘z saylovchilar bilan navbatdagi uchrashuvini tashkil etilib, unda deputat tomonidan amalga oshirilgan ishlar, ko‘tarilgan muammolar yuzasidan olib borilgan sa’y-harakatlar hamda mahalla hududini ijtimoiy-iqtisodiy rivojlantirish borasida bajarilgan vazifalar yuzasidan hisobot berildi. Uchrashuv davomida saylovchilar tomonidan bildirilgan taklif va murojaatlar ham atroflicha tinglanib, ularni hal etish bo‘yicha tegishli chora-tadbirlar belgilab olindi. 

Shuningdek, mahalla hududiga biriktirilgan boshqaruv-servis kompaniyalari vakillarining hisobotlari ham eshitildi. Hisobotlarda ko‘p qavatli uy-joy fondini saqlash, hududlarni obodonlashtirish, kommunal xizmatlar sifati, tozalikni ta’minlash, muhandislik tarmoqlaridan samarali foydalanish hamda aholiga qulay shart-sharoit yaratish borasida amalga oshirilgan ishlar xususida ma’lumotlar berildi. 

Muhokamalar jarayonida mavjud muammolar, aholining e’tiroz va takliflari, xizmat ko‘rsatish sifatini yanada oshirish, mas’uliyatni kuchaytirish hamda tizimli ishlash bo‘yicha zarur vazifalar belgilandi. Ta’kidlanganidek, bu kabi ochiq muloqotlar mahalla hududidagi dolzarb masalalarni o‘z vaqtida aniqlash, ularni manzilli hal etish va aholining deputat hamda mas’ul tashkilotlarga bo‘lgan ishonchini mustahkamlashda muhim ahamiyat kasb etadi.