Orzu mahallasida xotin-qizlar faoli faoliyati samaradorligi o‘rganildi

2026-yil 26-fevral kuni Oliy Majlis Qonunchilik palatasi deputati Aminova Aziza Marksovna hamda Xalq deputatlari Navoiy shahar Kengashi deputati N. Poleshuk Navoiy shahrida joylashgan Orzu mahallasida bo‘lib, mahalla xotin-qizlar faoli tomonidan amalga oshirilayotgan ishlar samaradorligini o‘rgandi. Tashrif davomida mahallada xotin-qizlarni ijtimoiy qo‘llab-quvvatlash, ularning bandligini ta’minlash, tadbirkorlikka jalb etish hamda muammolarini tizimli hal etish borasida olib borilayotgan ishlar bilan yaqindan tanishildi. Ayniqsa, “Ayollar daftari” asosida olib borilayotgan manzilli ishlar, kasb-hunarga o‘qitish va daromadli mehnatga yo‘naltirish masalalariga alohida e’tibor qaratildi.

Deputatlar mahalla faollari bilan muloqot qilib, xotin-qizlarning huquq va manfaatlarini himoya qilish, oilalarda ijtimoiy-ma’naviy muhitni mustahkamlash hamda profilaktik ishlar samaradorligini oshirish yuzasidan fikr almashdilar. Shuningdek, aniqlangan ayrim muammolarni hal etish bo‘yicha tegishli tavsiyalar berildi.

Uchrashuv yakunida xotin-qizlarni har tomonlama qo‘llab-quvvatlash, ularning jamiyatdagi faolligini oshirish va bandligini ta’minlash davlat siyosatining ustuvor yo‘nalishlaridan biri ekani ta’kidlandi. Bu kabi o‘rganishlar hududlarda olib borilayotgan ishlar natijadorligini yanada oshirishga xizmat qilishi qayd etildi.