Navoiy shahridagi “Bunyodkor” mahallasida hokim yordamchilari faoliyati o‘rganildi

Joriy yilning 26-fevral kuni Xalq deputatlari Navoiy shahar Kengashi deputati Jo‘rabek Hafizov hamda Kotibiyat bosh mutaxassisi D. Toyirov "Bunyodkor" mahalla fuqarolar yig‘inida bo‘lib, mahallalarda faoliyat yuritayotgan hokim yordamchilarining olib borayotgan ishlari bilan tanishdi.

Uchrashuv davomida mahallada aholi bandligini ta’minlash, tadbirkorlikni qo‘llab-quvvatlash, ijtimoiy himoyaga muhtoj oilalar bilan manzilli ishlash, yoshlar va xotin-qizlarni kasb-hunarga o‘qitish borasida amalga oshirilayotgan chora-tadbirlar muhokama qilindi. Hokim yordamchilari tomonidan aholi murojaatlarini o‘z vaqtida ko‘rib chiqish, muammolarni joyida hal etish hamda yangi ish o‘rinlari yaratish yuzasidan olib borilayotgan ishlar haqida batafsil ma’lumot berildi.

Mas’ullar mahallada tadbirkorlik muhitini yanada yaxshilash, imtiyozli kreditlar ajratish orqali oilalar daromadini oshirish, “Temir daftar”, “Ayollar daftari” va “Yoshlar daftari”ga kiritilgan fuqarolar bilan tizimli ishlash zarurligini ta’kidladi. Shuningdek, har bir murojaat ortida inson taqdiri turganini inobatga olib, mas’ullardan yanada faollik va tashabbuskorlik talab etilishi qayd etildi.

Tashrif davomida mahallada amalga oshirilayotgan obodonlashtirish ishlari, kichik biznes subyektlari faoliyati ham ko‘zdan kechirildi. Aholi bilan muloqot jarayonida ularning taklif va murojaatlari tinglanib, tegishli mas’ullarga aniq topshiriqlar berildi.

Uchrashuv yakunida mahallalarda hokim yordamchilari faoliyatini yanada samarali tashkil etish, aholi bandligini ta’minlash hamda ijtimoiy-iqtisodiy muammolarni hal etish bo‘yicha hamkorlikni kuchaytirish yuzasidan kelishib olindi.