Mektepke shekemgi bilimlendiriwge itibar - keleshekke itibar!
Prezidentimiz Shavkat Mirziyoevtıń usı jıl 18-19-sentyabr kúnleri Qaraqalpaqstan Respublikasına saparı aymaq turmısınıń barlıq baǵdarları qatarında tálim-tárbiya tarawın rawajlandırıw ushın da úlken áhimietke iye boldı.
Búgingi kúnde elimizde mektepke shekemgi bilimlendiriw sistemasın rawajlandırıw, balalardı hár tárepleme bárkamal etip tárbiyalaw, pedagoglardıń kásiplik potencialın arttırıw hám zamanagóy bilimlendiriw ortalıǵın jaratıwǵa ayrıqsha itibar qaratılmaqta. Bul baǵdardaǵı reformalardıń tiykarǵı maqseti - hár bir balanıń sapalı bilim hám tárbiya alıwı ushın teńdey imkaniyat jaratıw bolıp esaplanadı.
Qaraqalpaqstanda mektepke shekemgi bilimlendiriwge qamtıp alıw 84 procentke jetken. Bunnan bılay sapa kórsetkishin jaqsılaw hám qamtıp alıw dárejesin arttırıw maqsetinde jeke menshik baqsha ashatuǵın isbilermenlerge 15 jıl múddetke, 5 jıllıq jeńilletilgen dáwir menen 7 procentlik kredit beriletuǵını Prezidentimiz tárepinen ayrıqsha atap ótildi. Bul bolsa tek ǵana balalardıń mektepke shekemgi bilimlendiriwge qamtıp alınıwın jaqsılap qoymastan, kóplegen jaslardıń bántligin támiyinlewge xızmet etedi.
2026-jıldıń basında usınılǵan jańa baslamalarda da mektepke shekemgi bilimlendiriwge qamtıwdı arttırıw, pedagoglardıń tayarlıǵın kúsheytiw, dual bilimlendiriw tiykarında kadrlar tayarlaw hám jeke menshik sektor ushın qosımsha qollap-quwatlaw ilajlarına ayrıqsha itibar qaratılǵan edi. Qaraqalpaqstanǵa sapar dawamında belgilengen keń kólemli wazıypalar aymaqtıń sociallıq infrastrukturasın bunnan bılay da rawajlandırıw, xalıq ushın múnásip sharayatlar jaratıw hám insan kapitalına investiciyalardı kúsheytiw ushın jańa imkaniyatlar ashpaqta.
Mektepke shekemgi bilimlendiriw sistemasında jumıs alıp barıp atırǵan pedagog hám qánigeler sıpatında biz ushın bul itibar úlken juwapkershilik júkleydi. Sebebi búgin baqsha tárbiyalanıwshısına berilgen tálim-tárbiya - erteńgi jámiettiń bilimli, watansúygish hám belsendi puqarasın qáliplestiriwge qosılǵan eń áhmietli úles bolıp esaplanadı.
Jaratılıp atırǵan imkaniyatlardan nátiyjeli paydalanıp, mektepke shekemgi bilimlendiriw shólkemlerinde bilimlendiriwdiń sapasın bunnan bılay da arttırıw, aldınǵı pedagogikalıq tájiriybelerdi keńnen engiziw, balalar ushın zamanagóy hám qolaylı sharayatlardı jaratıw jolında bar kúsh-ǵayratımızdı jumsaymız. Mámleketimiz basshısınıń tarawǵa bolǵan joqarı itibarı bizge jańa kúsh, jańa baslama hám jáne de úlken juwapkershilik baǵıshlaydı.
Sebebi, balaǵa berilgen itibar - millet keleshegine berilgen itibar!
Gulshaxira Bekbosınova Xalıq deputatları Bozataw rayonlıq Keńesine ÓzLiDePnan saylanǵan deputat.