Tashrif davomida deputatlar o‘quv xonalari, kutubxona, to‘garaklar faoliyati hamda talabalar tomonidan turli mahsulotlar (kiyim-kechak va buyumlar) ishlab chiqarish jarayonlarini ko‘zdan kechirdilar. Shuningdek, o‘rta bo‘g‘in mutaxassislarini tayyorlash tizimiga alohida e’tibor qaratildi.

Shu bilan birga, talabalar ishtirokida ochiq muloqot tashkil etilib, yoshlarning muammo va takliflari tinglandi. Muloqot davomida ta’lim jarayonini amaliyot bilan yanada uyg‘unlashtirish, amaliyot bazalarini rivojlantirish hamda moddiy-texnik bazani mustahkamlash zarurligi ta’kidlandi.

Uchrashuvda deputatlar Prezidentimiz Shavkat Mirziyoyevning Oliy Majlis va xalqimizga Murojaatnomasi hamda “O‘zbekiston – 2030” strategiyasida belgilangan ustuvor vazifalarning mazmun-mohiyati haqida ham to‘xtalib o‘tdilar.

Xususan, 2026 yildan boshlab ilg‘or xorijiy ta’lim dasturlari joriy etilgan texnikumlar sonini 100 taga yetkazish, dual ta’lim asosida o‘qiyotgan 100 ming nafar o‘quvchiga stipendiya to‘lash hamda a’lo bahoda o‘qiyotgan talabalarga oshirilgan stipendiyalar berish rejalari ta’kidlab o‘tildi.

Tashrif yakunida deputatlar texnikum rahbariyatiga mehnat bozori talablariga mos malakali kadrlar tayyorlash yuzasidan o‘z tavsiya va takliflarini bildirdilar.