Xalq deputatlari G‘ozg‘on shahar Kengashining tegishli doimiy komissiyasi yig‘ilishi bo‘lib o‘tdi.

Kun tartibiga muvofiq, hududda yoshlar bandligini ta’minlash, ularni doimiy ish o‘rinlariga joylashtirish, kasb-hunarga yo‘naltirish, tadbirkorlik faoliyatiga keng jalb etish borasida amalga oshirilayotgan ishlar tanqidiy-tahliliy asosda ko‘rib chiqildi.

Shuningdek, “Tashabbusli byudjet” loyihalari doirasida kelib tushgan takliflar, ularning ijtimoiy ahamiyati, hududlar kesimida dolzarbligi, aholi manfaatlariga mosligi hamda ularni moliyalashtirish uchun mablag‘ ajratish masalalari batafsil muhokama qilindi.

Muhokamalar davomida quyidagi masalalarga alohida e’tibor qaratildi: 

yoshlar bandligini oshirish bo‘yicha qo‘shimcha va manzilli chora-tadbirlar ishlab chiqish; 

yangi ish o‘rinlarini yaratish hamda mavjud imkoniyatlardan samarali foydalanish; 

yoshlarni kasb-hunarga o‘qitish va tadbirkorlikka yo‘naltirish mexanizmlarini takomillashtirish; 

“Tashabbusli byudjet” loyihalarining ochiqligi, shaffofligi va samaradorligini ta’minlash; 

aholi manfaatiga xizmat qiladigan, ijtimoiy ahamiyatga ega loyihalarni ustuvor tartibda qo‘llab-quvvatlash. 

Yig‘ilish davomida mas’ul tashkilotlar hisobotlari eshitilib, mavjud muammolar va ularni bartaraf etish yo‘llari yuzasidan taklif va mulohazalar bildirildi.

Yig‘ilish yakunida kun tartibidagi masalalar yuzasidan tegishli qarorlar qabul qilinib, ijro uchun mas’ul tashkilotlarga aniq vazifalar belgilandi hamda ularning ijrosi doimiy nazoratga olinishi ta’kidlandi.

Mazkur yig‘ilish hududni kompleks rivojlantirish, yoshlar bandligini ta’minlash, aholi tashabbuslarini qo‘llab-quvvatlash hamda yoshlar ishtirokini kengaytirishga xizmat qiladi.