Hazortut mahallasida  xotin-qizlarni qo’llab-quvvatlash, ularning bandligini ta’minlash hamda daromad manbaini yaratishga qaratilgan ishlar izchil davom etmoqda. Bu borada ayniqsa tikuvchilik yo’nalishida amalga oshirilayotgan tashabbuslar alohida ahamiyat kasb etmoqda.

Romitan tuman mahalliy Kengash deputatlari M.Atoyeva, M.Jumatevalar  hamda huquqiy maslahat byurosi M.Fatullayev  ishtirokida o’tkazilgan o’rganish jarayonida Hazortut mahallada ayollarni tikuvchilikka jalb etish, ularni kasb-hunarga o’rgatish va amaliy ko’nikmalarini oshirish borasida amalga oshirilayotgan ishlar ko’zdan kechirildi. Xususan, tikuv mashinalari bilan ta’minlash, o’quv kurslarini tashkil etish hamda tayyor mahsulotlarni bozorga chiqarishga ko’maklashish orqali xotin-qizlarning iqtisodiy faolligini oshirishga erishilayotgani qayd etildi.

Shuningdek, uy sharoitida mehnat qilayotgan ayollar uchun qulay shart-sharoitlar yaratish, ularning bandligini rasmiylashtirish va daromadlarini barqarorlashtirish bo’yicha ham amaliy ishlar olib borilayotgani ta’kidlandi. Bu esa nafaqat oilalar farovonligini oshirishga, balki mahallaning ijtimoiy-iqtisodiy rivojiga ham ijobiy ta’sir ko’rsatmoqda.

Deputat tomonidan ushbu yo’nalishdagi ishlarni yanada kengaytirish, ko’proq xotin-qizlarni qamrab olish va ularni doimiy daromad manbai bilan ta’minlash yuzasidan tegishli tavsiya va ko’rsatmalar berildi. Xotin-qizlarning mehnatga jalb etilishi va ularni qo’llab-quvvatlash bundan buyon ham ustuvor vazifalardan biri bo’lib qolishi ta’kidlandi.