Olis hudud aholisi uchun tibbiy xizmatlar holati 25-Baynalminal saylov okrugi deputati X.Kalbayeva tomonidan atroflicha o‘rganilib, doimiy nazoratga olindi. Mazkur tashrifdan asosiy maqsad — chekka hududlarda yashovchi fuqarolarga ko‘rsatilayotgan tibbiy xizmatlar sifati, mavjud sharoitlar va tizimdagi muammolarni aniqlashdan iborat bo‘ldi.

O‘rganish jarayonida hududdagi tibbiyot muassasalari faoliyati ko‘zdan kechirilib, ularning moddiy-texnik bazasi, dori-darmon ta’minoti, zamonaviy uskunalar bilan jihozlanganlik darajasi hamda tibbiyot xodimlarining malakasi tahlil qilindi. Shuningdek, tez tibbiy yordam xizmatining ishlash holati, bemorlarni qabul qilish va ularga xizmat ko‘rsatish jarayonlari ham sinchkovlik bilan o‘rganildi.

Deputat tomonidan fuqarolar bilan bevosita muloqot o‘tkazilib, ularning sog‘liqni saqlash tizimiga oid murojaat va takliflari tinglandi. Aholi tomonidan ayrim tor soha mutaxassislarining yetishmasligi, dori vositalari ta’minotida uzilishlar, ayrim jihozlarning eskirganligi kabi muammolar tilga olindi. Shu bilan birga, ayrim hududlarda tibbiy xizmatlar sifati yaxshilanib borayotgani ham qayd etildi.

Tashrif davomida profilaktika ishlarini kuchaytirish, aholi o’rtasida sog’lom turmush tarzini targ’ib qilish, ayniqsa, yoshlar va ayollar salomatligiga alohida e’tibor qaratish zarurligi ta’kidlandi. Shuningdek, fuqarolarga tibbiy xizmatlardan foydalanish tartibi, ularning huquq va imkoniyatlari bo’yicha tushuntirish ishlari ham olib borildi.

Yakunda aniqlangan kamchiliklarni bartaraf etish, tibbiyot muassasalarini zamonaviy jihozlar bilan ta’minlash, malakali mutaxassislarni jalb etish hamda aholiga sifatli va tezkor tibbiy xizmat ko‘rsatishni yanada yaxshilash yuzasidan aniq chora-tadbirlar belgilandi. Ushbu masalalar ijrosi deputat tomonidan qat’iy nazoratga olinishi alohida ta’kidlandi.